Міхаіл Бабіч наведаў прадпрыемства Магілёўхімвалакно

Паглыбленне інтэграцыі з Беларуссю - прыярытэтная задача Расіі. Пра гэта напярэдадні 5-га Форуму рэгіёнаў дзвюх дзяржаў журналістам заявіў Надзвычайны і Паўнамоцны Пасол Расіі ў нашай краіне Міхаіл Бабіч. Напярэдадні дыпламат афіцыйна ўступіў на пасаду і ўжо сёння з рабочай паездкай наведаў Магілёў. Міхаіл Бабіч падкрэсліў, што стаіць задача не проста развіваць узровень інтэграцыі. У прыярытэце развіццё высокатэхналагічных галін - прамысловых прадпрыемстваў з інавацыйным патэнцыялам. Таксама Міхаіл Бабіч заявіў, што неабходны аб'ём нафтапрадуктаў, які патрэбен для развіцця беларускіх прадпрыемстваў, будзе пастаўляцца без абмежаванняў. У прыватнасці, згодна з дасягнутымі дамоўленасцямі аб павелічэнні паставак нафтапрадуктаў для прадпрыемстваў нафтахіміі, яна вырасце на 10-15 %. Што тычыцца цаны на газ, то яна была ўсталявана да 2020 года і ніякіх змяненняў не зведае.

Сёння дыпламат наведаў прадпрыемства Магілёўхімвалакно, дзе на стадыі будаўніцтва комплекс па вытворчасці поліэфірнай прадукцыі. Ён дазволіць атрымліваць новыя асартыменты сінтэтычнага валакна і павялічыць пастаўкі ў расійскія рэгіёны. Аб перспектывах супрацоўніцтва ішла размова і на будпляцоўцы сумеснага прадпрыемства "Омск Карбон Магілёў" па выпуску тэхнічнага вугляроду. У перспектыве стварэнне на яго базе навукова-даследчага цэнтра. Такая інтэграцыя дазволіць выйсці, на думку пасла, на вызначаныя ў перспектыве 50 мільярдаў долараў тавараабароту паміж Расіяй і Беларуссю. Міхаіл Бабіч наведаў сёння і Беларуска-Расійскі ўніверсітэт, дзе навучаюцца студэнты і па расійскай праграме.