Нацыянальны аэрапорт Мінск да 2025 года зможа абслугоўваць да 10 мільёнаў пасажыраў за год

Гэта стане магчыма, дзякуючы чарговаму этапу рэканструкцыі. У планах - пабудаваць яшчэ адзін тэрмінал, шматузроўневы паркінг і чыгунку да Мінска. Таксама да гэтага часу будзе рэканструяваная і першая ўзлётна-пасадачная паласа. Адправіць на рамонт старую ўзлётку стала магчыма пасля будаўніцтва другой паласы. Адкрылі яе летась. У цырымоніі ўдзельнічаў Кіраўнік дзяржавы. Гэты дзень стаў другім днём нараджэння для галоўнай паветранай гавані краіны. Дарэчы, роўна 37 гадоў назад у Смалявіцкім раёне і з'явіўся аэравакзал, які за гады існавання стаў сапраўдным міжнародным хабам. Унікальныя кадры фотахронікі і сучаснае аблічча аэрапорта - у матэрыяле Юрыя Шаўчука.

Бэкстэйдж Нацыянальнага аэрапорта Мінск - зона сартавання багажу. Звычайнаму чалавеку сюды не трапіць. Зараз мы знаходзімся каля стужкі, якая адпраўляе сумкі, што прыляцелі з Парыжа, наверх. І тут жа побач так званыя слізы. Па іх спускаюцца сумкі пасажыраў, якія толькі плануюць адправіцца ў шлях. Адначасова зона сартавання багажу можа абслугоўваць да 20 авіярэйсаў.

Журналісты Агенцтва тэленавін сталі не толькі першай здымачнай групай, якая пабывала ў гэтай забароненай зоне, але і дапамагла разабрацца з сумкамі, якія прыляцелі парыжскім рэйсам. Тут у іх ніколі не бывае лішніх рук, смяецца дыспетчар Вячаслаў. Але важна не толькі аператыўнасць, але і ўважлівасць. Бо самая малая памылка - і пасажыр з багажом паляцяць у розных кірунках. Каб такога не здаралася, на дапамогу прыходзіць спецабсталяванне.

Эксклюзіўныя фатаграфіі першага макета Нацыянальнага аэрапорта захоўваюцца ў мясцовым музеі

Па задумцы архітэктара Нэлі Цямновай, беларуская паветраная гавань павінна была выглядаць менавіта так. З яшчэ адным тэрміналам і гасцінічным комплексам. Але з-за недахопу фінансавання ў пачатку 90-х аэравакзал здабыў сваё звыклае аблічча. Аднак афіцыйнай датай заснавання лічыцца 1 ліпеня 1983 года.

Аляксандр Карпаў працуе ў Нацыянальным аэрапорце з першых дзён яго заснавання. Тады, успамінае мужчына, нават не было будынка і тэрміналаў. Абслугоўваць пасажыраў прыходзілася ў ангары. Рэйсаў было мала, бо асноўнай задачай беларускага аэравакзала было разгрузіць маскоўскі Шарамеццева. А потым былі хвацкія 90-я - поры павальнай прыватызацыі.

Трэба сказаць, што аэрапорт - прынадны кавалачак для інвестараў. Кіраўніку дзяржавы неаднаразова паступалі прапановы аддаць паветраную гавань прыватніку. Але Аляксандр Лукашэнка адмовіўся і аб гэтым не шкадуе.

Аб гэтым Аляксандр Лукашэнка распавёў год назад, калі ў Нацыянальным аэрапорце адкрывалі другую ўзлётна-пасадачную паласу. Кіраўнік дзяржавы асабіста прыняў удзел у цырымоніі.

Але перш Прэзідэнт асабіста пратэсціраваў новую трасу. Па ёй беларускі борт нумар адзін вылятаў на міжнародны форум у Кітай і на ёй жа прызямліўся.

Са з'яўленнем другой узлётна-пасадачнай паласы галоўная паветраная гавань краіны здабыла новае жыццё

Па-першае, стала можна прымаць і адпраўляць самыя вялікія самалёты ў свеце, у тым ліку Airbus A310. Па-другое, з'явіўся новы грузавы пірон і самае сучаснае абсталяванне для абслугоўвання паветраных суднаў. Сёння гэта дае магчымасць арганізаваць ТА і дазапраўку нават для трансатлантычных рэйсаў. Зараз гэтае пытанне прапрацоўваецца.

Нацыянальны аэрапорт Мінск гатовы да чарговага этапа рэканструкцыі. Зараз праходзіць этап узгаднення праектных дакументацый.

За гэты час плануецца пабудаваць яшчэ адзін тэрмінал, адкрыць шматузроўневы паркінг і запусціць цягнік па чыгунцы да Мінска. Тады ж скончацца рамонтныя работы і на першай узлётцы. У выніку аэрапорт зможа абслугоўваць да 10 мільёнаў чалавек за год. Летась лічба была толькі ў два разы менш. Але гэта таксама своеасаблівы рэкорд. Бо яшчэ 10 гадоў назад пасажырапаток быў усяго 800 тысяч чалавек за год. Сёння з-за пандэміі каранавіруса аэрапорт перажывае не лепшыя поры. Ужо зараз зразумела, што сёлета не да рэкордаў. Але паказчыкі пачынаюць ісці на ўзлёт.

З кожным годам лік авіяпералётаў у свеце расце. Дзякуючы прынятым дзяржавай мерам, у Беларусі атрымалася не толькі захаваць уласную паветраную гавань, але і, пабудаваўшы другую ўзлётна-пасадачную паласу, стварыць усе ўмовы, каб наш аэрапорт стаў міжнародным хабам. І гэта ўжо не проста фантазіі, а рэальныя перспектывы. Спецыялісты ўпэўніваюць, што да 2035 года інтэнсіўнасць палётаў у Нацыянальным аэрапорце Мінск можа скласці 260 самалётаў за дзень. Гэта не толькі ўласныя рэйсы, але і стыкоўка транзітных. Бо, як паказала гісторыя аэравакзала даўжынёй амаль 4 дзясяткі гадоў, мяжы дасканаласці няма.