Адзін з асноўных гандлёвых партнёраў Беларусі - Іркуцкая вобласць

Сёння Расія - гэта асноўны гандлёвы партнёр нашай краіны. На яе долю прыпадае амаль 40 % беларускага экспарту і 60 імпарту. Такія паказчыкі вынік і цеснага ўзаемадзеяння на рэгіянальным узроўні. Адзін з асноўных партнёраў нашай краіны - Іркуцкая вобласць - за першыя 6 месяцаў гэтага года ўжо дадала ў агульную скарбонку тавараабароту больш за паўсотні мільёнаў долараў. Прычым станоўчая дынаміка захоўваецца вось ужо трэці год пасля сустрэчы беларускага лідара з губернатарам вобласці. Тады партнёрства атрымала рэальную перазагрузку. Пакет новых пагадненняў будзе падпісаны ўжо гэтымі днямі на V Форуме рэгіёнаў Беларусі і Расіі. Актыў сумесных праектаў ацаніла Вікторыя Антоненкава.

Іркуцкая вобласць для беларусаў - гэта 6 тысяч кіламетраў на ўсход плюс 5 гадзін розніцы ў часе, суровае сібірскае надвор'е і самае глыбокае возера ў свеце - Байкал. Увогуле, край загадкавы, цудоўны, але малавядомы. А вось з нашай краінай іркуцяне знаёмыя добра. Тут для многіх Беларусь - гэта знак якасці і самая лепшая рэклама, а таму магазіны з нашай прадукцыяй часта менавіта так і называюцца - "Тавары з Беларусі". Такі гандлёвы аб'ект ёсць побач з домам карэннага сібірака, бурата па нацыянальнасці і настаяцеля будыйскага храма Білікта-ламы.

Пакуль шукалі магазін, пра які ён гаварыў, пераканаліся, што нягледзячы на тое, што ў Іркуцкай вобласці жывуць людзі розных нацыянальнасцяў і розных пераваг, наша прадукцыя падабаецца многім. У пацвярджэнне - у самым цэнтры горада кафэ з беларускай кухняй. Магазіны нашай касметыкі, абутку, тэкстылю і трыкатажу.

А некалькі гадоў таму ў Іркуцку адкрыўся магазін з беларускай прадукцыяй. Тут можна знайсці мясную, малочную прадукцыю, кандытарскія вырабы і бакалею. Гавораць, што чэргі тут зусім не знікаюць. Пойдзем, праверым.

Свежыя прадукты сюды прывозяць не радзей, чым раз на тыдзень. Магазін супрацоўнічае з прадпрыемствамі з усёй Беларусі, пры гэтым кожную пазіцыю выбіраюць вельмі дэталёва, як для ўласнага стала. А таму і пакупнікі задаволеныя, і продажы высокія.

У планах адкрыццё ў Іркуцку яшчэ двух магазінаў з беларускімі прадуктамі, а пакуль можна зрабіць online-заказ на рознічную або нават аптовую дастаўку. Сёння з расійскім рэгіёнам супрацоўнічаюць некалькі дзясяткаў беларускіх прадпрыемстваў: харчовай і лёгкай прамысловасці, машынабудаўнічая і ліфтавая вытворчасць. Апошнія тры гады паказчыкі тавараабароту растуць і за першае паўгоддзе 2018 ужо дадалі 44 % да мінулага года.

"У нас вельмі сур'ёзна развіваецца, ужо дзесьці ў 30 гарадах ёсць гандлёвыя пункты, дзе прадаюць беларускую прадукцыю. У нас кірмашы праводзяцца беларускія. Вядома, гэта вельмі цікава для ўсіх жыхароў вобласці".

Для Беларусі партнёрства з Іркуцкай вобласцю пралічана на гады наперад. Новы пакет пагадненняў абмяркуюць ужо ў рамках Форуму рэгіёнаў. А ў лістападзе ў Брэсце падчас 3-га пасяджэння рабочай групы па міжрэгіянальным супрацоўніцтве дэлегацыя Іркуцкай вобласці на чале з Сяргеем Леўчанкам і прадстаўнікі беларускага боку прадэманструюць новыя магчымасці кааперацыі малога і сярэдняга бізнесу.