Уборка азімага рапсу на старце ў Мінскай вобласці

Уборачная кампанія на старце ў Мінскай вобласці. Сёлета раней амаль на два тыдні, чым звычайна. Найперш на палях збіраюць азімы рапс у 13 раёнах вобласці. Гэтай культурай засеяна 85 тысяч гектараў. На поўдні цэнтральнага рэгіёна паспявае і пшаніца. Зажынкі азімых ўжо былі ў Старых Дарогах, Салігорску, Любані і Клецку. Калі дазволіць надвор'е, то на наступным тыдні да ўборкі хлеба далучыцца большасць раёнаў вобласці. Больш падрабязна Наталля Кезік.

На палі з азімай пшаніцай Сяргей Дычкоўскі заязджае кожны дзень - літаральна на зуб правярае гатоўнасць хлебных культур да ўборкі. Абмалот пачнецца, калі вільготнасць зерня ў калоссі дасягне 16 %. Калі пратрымаецца яснае надвор'е, то зажынкі справяць напрыканцы тыдня.

Збіраць збожжа ў гэтай гаспадарцы будуць 8 камбайнаў. Абмалаціць трэба амаль 2 тысячы гектараў. Зараз жа тэхніка працуе на палях з рапсам. У Слуцкім раёне сёлета пад гэту культуру адвялі на 2 тысячы гектараў больш. Разлічвалі і ўраджай атрымаць адпаведны, але адсутнасць вільгаці планы аграрыяў скарэкціравала.

Што да ўраджайнасці рапсу, то сёлета ў раёне разлічваюць на 20 цэнтнераў з гектара. Для параўнання: летась лічба дасягала 26. Але дакладныя лічбы называць рана - абмалочана толькі палова плошчаў.

Уборку рапсу ў Мінскай вобласці пачалі 13 раёнаў. Найбольш актыўна работа ідзе на поўдні рэгіёна - у Любанскім, Старадарожскім і Салігорскім раёнах. Усяго ж аграрыі ўжо убралі прыкладна пятую частку пасеваў азімай культуры.

Гарачая вясна паскорыла і надыход гарачай пары. У палях уборка збожжа, а вось другі ўкос траў наадварот затрымала. Нарыхтоўка кармоў у вобласці яшчэ толькі пачалася.

Убраць збожжа пры спрыяльных умовах аграрыі змогуць за некалькі тыдняў. Тэхніка да жніва гатова. Сёлета на збожжавыя палеткі выйдуць больш за 2 тысячы камбайнаў. 100 з іх новыя машыны, якія закупілі да сёлетняй уборачнай.