У Беларусі завяршаецца ўборачная кампанія

І калі збожжавыя ўжо ў засеках, то ўборка кукурузы, нарыхтоўка кармавой травы і цукровага бураку ў самым разгары. Цыбулю, якую завуць няйначай як золата палёў, актыўна ўбіраюць у Гомельскай вобласці. Яе ўраджай дазволіць і мясцовыя патрэбы задаволіць, і зарабіць на экспарце. Ганна Кавалёва наведала адну з самых унікальных гаспадарак рэгіёна і даведалася, як на беларускім "Усходзе" вырошчваюць галандскую культуру.

Віталь Бялко за рулём камбайна 17 гадоў. Увесь гэты час - на палях камбіната "Усход". За плячыма - вопыт працы з буракамі і бульбай. Зараз збірае ўраджай цыбулі. Культура, кажа, не капрызная, аднак свае сакрэты ў яе зборы ёсць.

Пад золата палёў у гаспадарцы аддалі 200 гектараў. Гэта самыя вялікія плошчы ў рэгіёне, занятыя цыбуляй. Беларускія аграномы тут на «ты» з галандскімі гатункамі. Сёлета працавалі з сямю відамі - усе пратэсціраваны на працягу не аднаго года. З унікальных для рэгіёна - "экзібішн". Гэты гатунак для камбіната даўно стаў візітнай карткай. Салатны, не па правілах салодкі і не выклікае слёз. Адна цыбуліна вырастае да кілаграма.

Сёлета надвор'е для цыбулі было неспрыяльным. У барацьбе з засухай месцамі выкарыстоўвалі палівальныя ўстаноўкі. Ураджайнасць, вядома, крыху ніжэйшая чым летась, але ўсё ж на ўзроўні. Дарэчы, гэтая гаспадарка для Гомеля мае стратэгічнае значэнне: яна цалкам задавальняе патрэбнасці абласнога цэнтра ў агародніне і садавіне. І сёлета сваіх пазіцый не пакіне.

Тут умеюць працаваць як на ўнутраны, так і на знешні рынкі. Напрыклад, гэтая цыбуля ў найбліжэйшыя дні адправіцца ў падарожжа. Яе чакаюць у Расіі і Малдове.

Пакуль жа яна ў сховішчы. Тут спецыяльны мікраклімат і адмысловая сістэма вентыляцыі - усё ў аўтаматычным рэжыме. Увогуле ў засекі загрузілі ўжо каля тысячы тон цыбулі. Большая частка пойдзе на экспарт. Дарэчы, у найбліжэйшы час спіс пакупнікоў могуць папоўніць краіны Прыбалтыкі.