У.Макей: Беларусь выступае за прамы дыялог паміж Еўрасаюзам і ЕАЭС

З памятнай датай супала і нефармальная сустрэча кіраўнікоў МЗС краін - удзельніц "Усходняга партнёрства". Гэта заявіў кіраўнік МЗС нашай краіны. Па словах Уладзіміра Макея, праз тыдзень Прэзідэнт Беларусі адкрые мемарыял у Трасцянцы пад Мінскам, дзе нацысты вынішчылі чвэрць мільёна чалавек з усёй Еўропы. У цырымоніі возьмуць удзел прэзідэнты Германіі і Аўстрыі. Таксама Уладзімір Макей падкрэсліў, што наша краіна выступае за прамы дыялог паміж Еўрасаюзам і ЕАЭС з перспектывай фарміравання стабільнай і квітнеючай агульнай эканамічнай прасторы паміж Ціхім і Атлантычным акіянамі. Міністр канстатаваў рост тавараабароту паміж Беларуссю і адзінай Еўропай. Адзначым, ЕС - наш другі эканамічны партнёр пасля Расіі.

"Мы гаварылі пра тое, як рэалізоўваць узгодненыя на саміце 20 задач "Усходняга партнёрства" да 2020 года, як адаптаваць "Усходняе партнёрства" да запатрабаванняў і інтарэсаў краін-партнёраў, як павышаць эфектыўнасць супрацоўніцтва ў яго рамках. Мы можам адназначна сцвярджаць, што за апошнія некалькі гадоў, у тым ліку і дзякуючы нашаму ўдзелу ў гэтай ініцыятыве, мы дасягнулі шэраг канкрэтных вынікаў. У нас у цэлым супрацоўніцтва, гандлёва-эканамічнае супрацоўніцтва з ЕС палепшылася. І летась мы больш чым на 20 працэнтаў павялічылі тавараабарот".

Іаханес Хан, Еўракамісар па еўрапейскай палітыцы суседства і перамовах аб пашырэнні ЕС: "У нас была вельмі адкрытая дыскусія і пазітыўная. Мы абмеркавалі нашу будучыню - як рэалізаваць усё тое, наконт чаго мы дамовіліся на леташнім лістападаўскім саміце. Я маю на ўвазе ўзгодненыя на той сустрэчы практычныя мэты, якія павінны быць рэалізаваныя намі да 2020 года".

Іаханес Хан таксама адзначыў: пагадненне аб прыярытэтах партнёрства можа быць падпісана ўжо да канца гэтага года. Таксама дыпламат заявіў, што Беларусі і ЕС па сілах паскорыцца ў перамовах па палягчэнні візавага рэжыму.