У Мінску адкрыўся "Кастрычніцкі эканамічны форум"

Традыцыя восеньскімі днямі - адкрыты дыялог аб глабальнай эканоміцы і сусветным гандлі. У Мінску стартаваў "Кастрычніцкі эканамичны форум". Удзельнікі (а гэта дзелавая супольнасць, прадстаўнікі органаў дзяржкіравання і сусветныя эксперты) адзначылі ўмовы, што створаны ў Беларусі для эфектыўнай працы эканомікі: гэта і стабільнасць падатковай сістэмы, і падзел функцый уласніка і рэгулятара, і аптымізацыя сістэмы дзяржкіравання. Разам з тым задача нумар адзін для кожнага прадпрыемства - гэта інтэграцыя ў глабальны гандаль. І тут важна ўлічваць усе плюсы, а таксама рызыкі. Наконт гэтага і будуць гаварыць два дні ў Мінску. Заявы з першых вуснаў пачула наш карэспандэнт Святлана Лук’янюк.

Такі прадстаўнічы адкрыты дыялог ужо стаў традыцыйным у Беларусі. Увосень чыноўнікі, эксперты і бізнес гавораць, cпрачаюцца і дзеляцца сваім бачаннем дня сённяшняга і перспектывамі на заўтра. Глабальная або вялікая эканоміка - гэта эфектыўнасць дзяржсектару, развіццё малога бізнесу, гандаль унутры краіны і па-за межамі, а таксама тое, як мы выглядаем на фоне сусветных краін, з якімі працуем або чые рынкі нам цікавыя.

На гэты раз тэма "Кастрычніцкага эканамічнага форуму" ў Мінску гучыць як Беларусь у дзівосным новым свеце. Адкрыта аб зробленым і аб тым, што яшчэ трэба, гавораць шосты раз.

Гэта асабліва важна сёння, калі гандлёвыя канфлікты паміж ЗША і Кітаем і іх асноўнымі партнёрамі могуць у выніку паўплываць на глабальны гандаль падобна фінансаваму крызісу 2008-га. Пра гэта гаварылі прадстаўнікі Сусветнага банка і адзначалі, што Беларусі з адкрытай эканомікай трэба падтрымліваць эканамічную стабільнасць і стымуляваць экспарт.

Якраз на гэта Беларусь робіць стаўку. Ужо ў бюджэце 2019 года падтрымка з дзяржказны скарачаецца на 10 %, і гэты трэнд будзе прадоўжаны. У цэлым прадказальнасць дзяржпалітыкі - гэта лепшы эканамічны курс для краіны. Курс, вызначаны Усебеларускім народным сходам, застаецца нязменным.

З трыбуны форуму яшчэ раз падкрэсліваецца курс Беларусі на дэкрыміналізацыю бізнесу. Дзяржава не імкнецца караць любымі спосабамі. Эканамічныя метады сёння больш дзейсныя, чым сілавыя.

Сёння бачны эфект ад многіх рашэнняў. Так, новыя тэхналогіі - гэта новая эканоміка, дзе машыны замяняюць людзей, але пры гэтым ствараюцца і новыя прадпрыемствы. А для іх ужо патрэбныя іншыя спецыялісты, з іншымі ведамі. Як арыенцір - ПВТ. Пасля падпісанага Прэзідэнтам Дэкрэта № 8 IT-бум бачны няўзброеным вокам. Плюс 200 новых рэзідэнтаў і рост экспарту амаль напалову за паўгода.

Сёлета Беларусь паказвае добрыя тэмпы развіцця эканомікі і не зніжае прагноз па ВУП ніжэй за 3,5 % па годзе. На наступны анансуе 4 %. Пры гэтым нароўні з IT гатовая ўкладвацца і прамысловасць інавацыйная ў скарбонку экспарту.

Піку нашага знешняга гандлю мы дасягнулі 5 гадоў таму - у 2012-ым. Пасля чатыры гады падалі. І толькі напрыканцы 2016 года дзякуючы аднаўленню сусветнай эканомікі пачалі прырастаць. Летась плюс чвэрць, і сёлета ўжо амаль 20 %. Але пакуль да піку не хапае 30 мільярдаў долараў.

Новыя гарызонты для вялікіх продажаў адкрывае рынак СГА. Сёння мы ў працэсе перамоў па ўступленні. На форуме агучылі і магчымую дату - 2020 год.

Ужо заўтра на "Кастрычніцкім форуме" будуць гаварыць аб рэформах для вырашэння лакальных праблем, а таксама аб развіцці канкурэнцыі, дзе роўныя ўмовы працы і эфектыўныя рынкі.