Хлебны сезон у цэнтральным рэгіёне

Ідзе актыўная ўборка збожжавых. Аграрыі намалацілі ўжо амаль пяцьсот тысяч тон хлеба.  Апрацавана  160 тысяч гектараў. Гэта больш за трыццаць працэнтаў ад агульнай плошчы. Хто сёлета ў лідарах па абмалоце і ў каго самы багаты ўраджай? Ведае Наталля Кезік.

10 гадоў побач і два сезоны ў адным камбайне. Сямейны падрад - Вольга і Іван Шаціла, разам на ўборачнай працуюць другі год запар. Жанчына на летні месяц змяняе сваю кваліфікацыю з агранома на памочніка камбайнера. Здараюцца на працы і спрэчкі паміж механізатарам і аграномам.

Сям'я Шаціла вось-вось намалоціць сваю першую тысячу тон збожжа. Таму нават дзеля інтэрв'ю неахвотна спыняюць працу. Ячмень ужо зжалі, зараз працуюць на палях з пшаніцай.

Штодзень на палях гаспадаркі - 7 камбайнаў. Пры добрым раскладзе абмалочваюць прыкладна 100 гектараў. Каб справіць дажынкі, механізатарам неабходна яшчэ 10 дзён.

Тут адразу на полі салому збіраюць у цюкі, адзін такі вал важыць прыкладна 300 кілаграмаў. Саламяны ўраджай звязуць на склад толькі тады, калі апошні камбайн завершыць працу на гэтым полі.

А вось машыны са збожжам на сушыльны комплекс прыязджаюць у рэжыме нон-стоп – за дзень мінімум 100 грузавікоў. Зімой Людміла Шакура вядзе бухгалтэрыю гаспадаркі ў кабінеце. На перыяд уборачнай падлічвае намалочаны ўраджай.

На сёння ў цэнтральным рэгіёне ўбралі трэцюю частку палеткаў са збожжавымі. Механізатары намалацілі амаль 500 тысяч тон. Лідары – паўднёвыя раёны: Клецкі, Любанскі, Нясвіжскі. Там убралі больш за палову плошчаў.