У Віцебскай вобласці рэкордны ўраджай ільну

Напярэдадні прафесійнага свята аграрыяў ушаноўваюць і ў Віцебскай вобласці. Сёлета на поўначы краіны рэкордны ўраджай ільну. У Прыдзвінні нарыхтавалі больш як 43 тысячы тон сыравіны - гэта самы высокі паказчык па краіне. І якасць трасты на ўзроўні! Узнагародамі на свяце адзначылі аграномаў, механізатараў і вадзіцеляў гаспадарак. Спецыялісты падкрэсліваюць: высокі ўраджай - гэта вынік абсалютнага выконвання тэхналогій. Тады і капрызы прыроды капрызнаму льну хоць бы што.

Расказвае Вольга Маслоўская.

Гэтыя кадры знятыя мінулым летам. Ужо тады, гледзячы на льняныя палі, спецыялісты гаварылі: ураджаю быць. Вядома, сваю ролю сыграла надвор'е: паўночны ўсход не так засушыла, як поўдзень краіны. Але галоўнае - дакладнае выконванне тэхналогіі. Угнаенняў і тэхнікі аграрыям Віцебскай вобласці хапіла. Высадзілі айчынныя гатункі. "Грант" - па-за канкурэнцыяй. А яшчэ землі падабралі з розумам: практыка аддаваць пад паўночны шоўк палі па астаткавым прынцыпе сыходзіць у мінулае.

Лідар на льняным полі - Дубровенскі льнозавод. Прадпрыемству 80 гадоў, і ўпершыню атрымалася нарыхтаваць 13 тысяч тон трасты з ураджайнасцю 47 цэнтнераў з гектара - у паўтара раза вышэй за сярэднюю па краіне. Праца ў тры змены без выхадных на ўвесь год заводу забяспечаная.

Вольга Крывава на заводзе 34 гады. А калі палічыць агульны стаж усёй сям'і, атрымаецца працоўная біяграфія даўжынёй у некалькі стагоддзяў. Спецыяліст ведае: колькасць - гэта яшчэ не ўсё. Вырасціць якасны лён - задача няпростая.

Ільновалакно высокай якасці павінна быць адначасова трывалым, тонкім і гнуткім. Але дабіцца гэтага зусім няпроста. Калі падчас вылежкі льну расы і дажджоў недастаткова, валакно атрымаецца нягнуткім. А калі наадварот - вільгаці занадта шмат - валакно будзе зусім нетрывалым.

Плюс да ўсяго - яшчэ з дзясятак фактараў, якія ўплываюць на якасць ільну. Але культура гэтая не толькі капрызная, але і ўдзячная.

З першымі партыямі льновалакна новага ўраджаю ўжо працуюць і айчынныя тэкстыльшчыкі. Але нават не за імі апошняе слова, а за пакупніком. Сёння беларускі лён ведаюць у сарака краінах свету.