Маштабныя вучэнні прайшлі ў Стаўбцоўскім раёне

Тыдзень бяспекі працягваецца ў Мінскай вобласці. Маштабныя вучэнні сёння прайшлі ў Стаўбцоўскім раёне. Ратавальнікі адпрацавалі комплекс дзеянняў падчас веснавой паводкі.

Да супрацоўнікаў МНС далучыліся ўсе аварыйныя службы раёна. Згодна з планам, менш чым за паўгадзіны здзейснілі адпампоўванне вады, аказалі медыцынскую дапамогу жыхарам, а таксама правялі падсыпку размытай дарогі. Пасля - эвакуацыя ў раённай школе. На вучэннях пабываў Ілья Цвяткоў.

Пятнаццаць адзінак спецтэхнікі і дзясяткі байцоў асабовага складу ў поўнай баявой гатоўнасці. Падчас вучэнняў ратавальнікі адпрацоўваюць наступствы магчымай вясенняй паводкі.
Згодна з легендай, з-за паводкі размыла галоўную дарогу населенага пункта, вада выйшла з берагоў і падтапіла прыватныя дамы. На рэагаванне не больш за паўгадзіны. Галоўнае – выконваць строгую паслядоўнасць дзеянняў. Спачатку адпампоўванне вады з ракі. Наступны этап – аднаўленне транспартных зносін з населеным пунктам. Дарожныя службы пачалі падсыпаць пяском размытае палатно.
Яшчэ адна частка вучэнняў - эвакуацыя адной са школ раёна. На веданне правіл дзеянняў у надзвычайных сітуацыях праверылі вучняў і выкладчыкаў навучальнай установы.
Падчас эвауацыі (асабліва пры ўзгаранні памяшкання) абавязкова трэба звяртаць увагу вось на такія планы эвакуацыі, яны ёсць амаль у кожным будынку. Мы знаходзімся зараз вось тут, значыць вось гэта наш найбліжэйшы запасны выхад. Нас чакае спуск па аварыйнай лесвіцы.
Пасля практычных навыкаў праверылі і тэарэтычныя веды. Ратавальнікі нагадалі школьнікам правілы пажарнай бяспекі. А комплексныя вучэнні ў вобласці прадоўжацца да 1 сакавіка.