Урок бяспекі: у цэнтры Віцебска прайшло маштабнае вучэнне ратавальнікаў

Віцебскія ратавальнікі правялі маштабнае вучэнне ў цэнтры горада. Галоўнай лакацыяй стаў буйны гандлёвы цэнтр, аб'ект няпросты, ёсць паркінг. Штодня сюды купіць і проста адпачыць прыходзіць вялікая колькасць наведвальнікаў. І кожны з іх павінен адчуваць сябе ў бяспецы.

Згодна з легендай вучэнняў, здэтанавала выбуховае прыстасаванне на шматузроўневай паркоўцы гандлёвага цэнтра, агонь хутка ахапіў паверхі будынка. На момант надзвычайнай сітуацыі ўнутры знаходзілася каля 4 тыс. наведвальнікаў, у тым ліку і дзеці.

Паводле сцэнарыя змадэлявалі выхадны дзень, калі наплыў наведвальнікаў у гандлёвым цэнтры максімальны. Галоўная задача заключалася ў тым, каб спрацаваць аператыўна і зладжана: эвакуіраваць і выратаваць людзей з ахопленага агнём будынка ва ўмовах найскладанейшай надзвычайнай сітуацыі (падрабязнасці ў відэа).