Чацвярых хлопчыкаў эвакуіравалі з затопленай пячоры ў Тайландзе

Унікальная аперацыя па выратаванні дзяцей у Тайландзе - і першыя поспехі. Ратавальнікі змаглі эвакуіраваць чацвярых хлопчыкаў з затопленай пячоры. Хлопцы былі заблакіраваныя там два тыдні. У аперацыі ўдзельнічаюць 90 дайвераў. Падрабязнасці ў нашым сюжэце.

16 дзён у цемры.

Вырашальны этап аперацыі па выратаванні дзяцей з пячоры Тхам Луанг пачаўся ў нядзелю ў 10 гадзін раніцы па мясцовым часе. Васямнаццаць вадалазаў - 13 замежнікаў і пяцёра тайскіх падводнікаў - накіраваліся да дзяцей, якія ўжо трэці тыдзень знаходзяцца пад зямлёй. Рашэнне аб пачатку эвакуацыі было прынята з улікам прагнозу надвор'я і чаканых неўзабаве трапічных ліўняў. Знадворку пячоры ратавальнікі працуюць над тым, каб вада не трапляла ўнутр. За мінулыя дні некалькі камер падзямелля былі дастаткова асушаныя. Спецыяльныя брыгады перакрываюць вадасцёкі, якія ідуць у пячору, мяшкамі з пяском і зямлёй. У саміх тунэлях для адвядзення вады ўсталявалі трубы.

Нарангсак Асатханакон, кіраўнік штаба выратавальнай аперацыі: "Наступіў дзень Х. Хлопцы гатовыя да любых выклікаў. Мы знаходзімся на піку гатовасці".

Раніцай у нядзелю была ачышчаная тэрыторыя каля пячоры. Затым паліцыя і вайскоўцы размецілі і перакрылі 200-метровую зону, закрытую для ўсіх, хто не заняты непасрэдна ў эвакуацыі. А перад пачаткам аперацыі ратавальнікі паведамілі бацькам і сваякам дзяцей дэталі аперацыі і заручыліся іх згодай. Вяртання міжвольных палонных усе чакаюць з нецярпеннем. Мясцовыя жыхары горача моляцца за выратаванне, узносячы малітвы ў храме Чыан-грай. У пячоры з хлопчыкамі знаходзіцца аўстралійскі доктар, які вырашыў пачаць выратавальную аперацыю з самых слабых дзяцей. Улічваўся і псіхалагічны стан падлеткаў. Да таго ж многія з хлопцаў не ўмеюць плаваць, яны выраслі ў горнай мясцовасці.

І вось першая радасная навіна!

Нарангсак Асатханакон, кіраўнік штаба выратавальнай аперацыі: "Я хачу паведаміць усім, хто падтрымліваў нас. Нарэшце мы бачым першых выратаваных хлопчыкаў!"

З часткова затопленай пячоры Тхам Луанг выведзеныя першыя двое хлопчыкаў. У размешчаным ля ўваходу ў пячору палявым шпіталі іх агледзелі дактары. Пасля даставілі ў бальніцу, якая знаходзіцца прыкладна за гадзіну язды ад пячоры. А яшчэ праз паўгадзіны стала вядома, што яшчэ два дзіцяці дасягнулі базавага лагера дайвераў. Праз 30 хвілін і гэтыя дзеці выйшлі з пячоры і былі агледжаныя медыкамі і адпраўленыя ў бальніцу.

Як і планавалася, дзяцей са зняволення выводзілі па адным - шматлікія праходы вельмі вузкія. Усяго ж кожнаму хлопчыку прыйшлося пераадолець больш за 4 кіламетры. Участкі, запоўненыя вадой, дзеці праходзілі ў вадалазным рыштунку - карыстацца аквалангамі іх пад зямлёй вучылі некалькі дзён. Кожнага суправаджалі два аквалангісты - яны, акрамя свайго, транспартуюць і балон з кіслародам для школьніка. Ішлі ў звязку - кожнае дзіця звязана тросам з дайверамі. Першы рухаецца наперадзе, другі страхуе ззаду. Спецыяльна ўсталяваныя лямпы асвятляюць шлях і не даюць збіцца з яго.

Пасля першага паспяхова праведзенага выратавальнага дня аперацыю прыпынілі. Дайверам неабходна падрыхтавацца да наступнага этапу аперацыі.

Нарангсак Асатханакон, кіраўнік штаба выратавальнай аперацыі: "Аперацыя па эвакуацыі дзяцей працягнецца праз 10, максімум 20 гадзін. Зараз ідзе замена скарыстаных на працягу сённяшняга дня балонаў са сціснутым паветрам, якія размяшчаюцца на маршруце эвакуацыі".

Сёння выратавальная аперацыя працягнецца. Зараз пад зямлёй застаюцца 8 спартсменаў і іх 25-гадовы трэнер - ён пакіне пячору апошнім. Усе выратаваныя пачнуць праходзіць курс рэабілітацыі ў бальніцы пасля працяглага знаходжання ў пячоры.