"Хезбала" за суткі выпусціла больш як 90 ракет па поўначы Ізраіля

"Хезбала" за суткі выпусціла больш як 90 ракет па поўначы Ізраіля. Большасць была перахоплена, астатнія ўпалі ў адкрытай мясцовасці.

У горадзе Тамра ў выніку атакі 5 чалавек атрымалі раненні, разбураны два жылыя комплексы і аўтамабілі. Па даных агенцтва Reuters, у горадзе Ако беспілотнік "Хезбалы" урэзаўся ў адзін з заводаў - пацярпелі двое супрацоўнікаў фабрыкі.

Тым часам улады Ірана "вызначаць форму адказу" на суботнюю ізраільскую атаку. Пра гэта заявіў вярхоўны лідар краіны Аятала Алі Хаменеі.

Міністр замежных спраў Ірана Абас Аракчы абвінаваціў ЗША ў дачыненні да гэтай атакі на Тэгеран. Паводле яго слоў, Белы дом падаў ізраільскім ВПС паветраны калідор і неабходнае абсталяванне.

А Ірак ужо накіраваў ААН пратэст у сувязі з пазапраўным пралётам ізраільскіх самалётаў у яго паветранай прасторы пры атацы на Іран.

Афіцыйны Тэль-Авіў паведамляе, што начны ўдар 26 кастрычніка дасягнуў усіх вызначаных цэляў. Як заявіў прэм'ер Ізраіля Біньямін Нетаньяху, краіна нанесла моцны ўрон абарончаму патэнцыялу Ірана, а таксама яго ракетнай вытворчасці. У Тэгеране гэта аспрэчваюць.