У Сінгапуры завяршыўся гістарычны амерыкана-паўночнакарэйскі саміт

І ўсё-такі яны сустрэліся. У Сінгапуры завяршыўся гістарычны амерыкана-паўночнакарэйскі саміт. Дональд Трамп і Кім Чэн Ын прагаварылі пытанні дэнуклеарызацыі Карэйскага паўвострава і гарантыі бяспекі для Пхеньяна. Гаспадар Белага дома заявіў аб спыненні сумесных вучэнняў з Сеулам і магчымым вывадзе амерыканскага ваеннага кантынгенту з Паўднёвай Карэі. Эксперты называюць сустрэчу выйгрышнай для ўсіх. Для Кім Чэн Ына пачатак нармалізацыі адносін са Злучанымі Штатамі - гэта шанц вывесці краіну з-пад суровых санкцый і выйсці з міжнароднай ізаляцыі. Дональду Трампу такі дыпламатычны манеўр дапаможа паправіць імідж пасля правальнага саміту "Вялікай сямёркі" ў Канадзе - там амерыканскі прэзідэнт пасварыўся з саюзнікамі з-за мытных пошлін. Ну, а для ўсяго астатняга свету гэта прычына ўздыхнуць спакойна - ядзерны апакаліпсіс адкладваецца. Падрабязнасці гістарычнай сустрэчы ў Юрыя Казлова.

У тое, што такая сустрэча ў прынцыпе магчымая, да апошняга не верылі многія. Усяго паўгода таму Карэйскі паўвостраў быў на мяжы новай вайны, а ЗША і КНДР адкрыта пагражалі адно аднаму ядзернымі ўдарамі. "Карантышка" і "чалавек-ракета" - так Дональд Трамп звяртаўся да паўночнакарэйскага лідара. Пхеньян называў гаспадара Белага дома "старым" і "маразматыкам".

Месца сустрэчы - востраў Сентоса - у перакладзе з малазійскай "мір, спакой". Гэта курортная зона Сінгапура. Горад быў выбраны ў якасці пляцоўкі для перамоў невыпадкова - Сінгапур падтрымлівае сувязі як з Вашынгтонам, так і Пхеньянам. Арганізацыя саміту каштавала мясцовым уладам 20 мільёнаў долараў. Іх спісалі на іміджавыя выдаткі.

У Сінгапур Дональд Трамп і Кім Чэн Ын прыбылі напярэдадні. Кіраўнік Паўночнай Карэі правёў вечар, аглядаючы славутасці, амерыканскі прэзідэнт сядзеў у Twitter, а таксама размаўляў па тэлефоне з калегамі з Паўднёвай Карэі і Японіі. Першая сустрэча прэзідэнта ЗША і кіраўніка КНДР адбылася ў 2 гадзіны ночы па мінскім часе.

Перамовы складаліся з трох раўндаў - размова тэт-а-тэт, пашыранае пасяджэнне і рабочы абед. У меню кактэйль з крэветак з салатай з авакада, ялавічныя рэбры з бульбай, тушаная траска з гароднінай. Плюс дэсерт. Што пілі кіраўнікі дзяржаў - не паведамляецца. Вынікам сустрэчы стала падпісанне сумеснага дакумента. У ім няма канкрэтыкі, але ўжо сам факт існавання такога камюніке - гэта прарыў. ЗША і КНДР заявілі аб перазапуску адносін, дэкларавалі імкненне да міру на Карэйскім паўвостраве і яго дэнуклеарызацыі. Дагавор бакі змацавалі подпісамі і поціскам рукі - ён доўжыўся 12 секунд.

Дарэчы, манера Трампа паціскаць руку даўно стала легендай. Ахвярамі жалезнай хваткі амерыканскага прэзідэнта станавіліся многія сусветныя лідары. У Сінгапуры, аднак, гаспадар Белага дома быў даволі далікатны. Ці то стомленасць паўплывала, ці то Кім Чэн Ын аказаўся мацнейшы за кіраўнікоў еўрапейскіх дзяржаў…

За перамовамі пільна сачылі ў Паўднёвай Карэі. Фармальна гэтая краіна дагэтуль знаходзіцца ў стане вайны з КНДР. Мясцовыя тэлеканалы вялі з Сінгапура прамыя трансляцыі. Іх можна было глядзець і ў грамадскіх месцах - у аэрапортах, на вакзалах.

Кадры з гістарычнага саміту ўжо паспелі прааналізаваць псіхолагі. Яны адзначылі, што абодва палітыкі прыкметна нерваваліся, але спрабавалі выглядаць адкрытымі і шчырымі. Пляскалі адзін аднаго па плячы, усміхаліся. У перапынку паміж перамовамі Трамп паказаў калегу салон свайго лімузіна - у ЗША яго называюць "Звер". А падчас сумеснага фатаграфавання гаспадар Белага дома і зусім назваў паўночнакарэйскага візаві таленавітым, разумным перагаворшчыкам і лідарам, які шчыра любіць сваю краіну. Развітваючыся з Кім Чэн Ынам, амерыканскі прэзідэнт запрасіў кіраўніка КНДР у Вашынгтон.