У Тайландзе пачалася аперацыя па выратаванні дзяцей, якія захраснулі ў пячоры

Прафесійная каманда з 18 чалавек (сярод якіх вайскоўцы і 5 вопытных дайвераў) адправілася ў далёкія раёны пячоры. Падлеткаў будуць выводзіць групамі: хлопчыкі павінны абмінуць вузкія, месцамі затопленыя праёмы пячоры, дзе-нідзе прыйдзецца апускацца ў ваду. Нагадаем, дзяцей (большасць з якіх не ўмеюць плаваць) усяго за некалькі дзён навучылі карыстацца аквалангісцкім абсталяваннем. Раней ратавальнікі заявілі, што эвакуацыю адкладваць больш нельга. Неўзабаве могуць пачацца мусонныя дажджы, якія канчаткова затопяць вузкія тунэлі ў пячоры.