Ахвяр атамнай бамбардзіроўкі Хірасімы ўспамінаюць у Японіі

У Японіі праходзяць памятныя мерапрыемствы, прымеркаваныя да 78-й гадавіны амерыканскай атамнай бамбардзіроўкі Хірасімы. Па ўсёй краіне была аб'яўлена хвіліна маўчання, адлік якой вялі ўдары звана ў памятным парку Хірасімы.

У цырымоніі прынялі ўдзел 7 тысяч чалавек, у тым ліку рэкордная колькасць дыпламатычных місій - прысутнічалі прадстаўнікі 111 дзяржаў. Вось толькі хто бамбіў мірныя японскія гарады, не згадаў ні прэм'ер-міністр краіны, ні губернатар Хірасімы. Умаўчаў пра гэта ў пасланні і Генсак ААН Гутэрыш.

У выніку выбуху атамнай бомбы, скінутай амерыканцамі на Хірасіму, у адзін дзень, паводле розных ацэнак, загінулі ад 70 да 100 тысяч жыхароў. Ужо да канца 1945-га колькасць ахвяр узрасла да 140 тысяч. Усяго ад наступстваў бамбардзіроўкі памерлі больш за 300 тысяч чалавек.