Белтэлерадыёкампанія працягвае працу над адным з самых маштабных праектаў года - дзіцячым "Еўрабачаннем"

Шэсць тыдняў застаецца да дзіцячага "Еўрабачання". Ужо ў панядзелак у Мінск прыбудзе каманда Еўрапейскага Вяшчальнага Саюза. Разам з экспертамі Белтэлерадыёкампаніі яны будуць працаваць над падрыхтоўкай шоу. Наперадзе - самы адказны этап для арганізатараў. Ужо 5 лістапада пачнецца ўладкаванне "Мінск-Арэны", адкуль і будзе весціся прамая трансляцыя выніковага гала-канцэрта. Дарэчы, каб ацаніць яго на свае вочы, гледачам варта паспяшацца. Білетаў на галоўнае мерапрыемства шоу практычна не засталося.

Расказвае Іна Пілевіч.

Яго трыумфальная кампазіцыя загучала новымі фарбамі. Прадстаўнік Беларусі на дзіцячым "Еўрабачанні" Даніэль Ястрэмскі на рэпетыцыях адточвае выкананне новай версіі песні Time. Спецыяльна да гала-канцэрта зведала змяненні аранжыроўка. Фінальная версія хіта ўжо даступная для праслухоўвання і запампоўкі на ўсіх лічбавых платформах.

Падпяваць Даніэлю можна будзе не толькі ля экрана тэлевізара, але і ў "Мінск-Арэне". Праўда, прыхільнікам конкурсу варта паспяшацца. Усе білеты ў залу на галоўнае мерапрыемства дзіцячага "Еўрабачання" прададзеныя. Застаюцца толькі месцы на танцпляц. Білеты можна набыць у касах сталіцы, а таксама анлайн на сайце BуСard.

У продажы білеты і на генеральны прагон. Ён абсалютна ідэнтычны гала-канцэрту і таксама праходзіць у рэжыме "лайв". Адрозненне толькі ў тым, што падчас прагону свае балы выстаўляе журы. А атрыманыя вынікі будуць аб'яўленыя ў прамым эфіры падчас фіналу.

Больш як 2000 білетаў на дзіцячае "Еўрабачанне" - у падарунак. Запрашальныя на шоу неўзабаве атрымаюць выхаванцы інтэрнатаў, дзеці з абмежаванымі магчымасцямі, а таксама адораныя вучні. У зале "Мінск-Арэны" будуць запальваць юныя гледачы з усіх абласцей краіны. Падтрымаць свайго дэлегата на дзіцячым "Еўрабачанні" беларусы змогуць і голасам. Гледачы з любога месца свету выкажуць перавагі ў Інтэрнэце. За 48 гадзін да пачатку трансляцыі на афіцыйным сайце конкурсу можна будзе вызначыць сваіх фаварытаў шоу.

У панядзелак у Мінск прыедзе тэхнічны дырэктар конкурсу - Тарма Крым пачне сваю працу са службамі "Мінск-Арэны". Уладкаванне пляцоўкі конкурсу пачнецца ўжо 5 лістапада. Дэлегацыі ж прыляцяць за тыдзень да шоу. У графіку краін-удзельніц - запісы сумеснай песні, рэпетыцыі і экскурсіі па горадзе.