Даніэль Ястрэмскі прадставіць Беларусь на дзіцячым "Еўрабачанні" ў Мінску

Улюбёнец публікі з песняй Time заваяваў сэрцы тэлегледачоў і атрымаў перамогу ў нацыянальным адборы. Нагадаю, музычнае супрацьстаянне разгарэлася напярэдадні ўвечары ў прамым эфіры тэлеканалаў "Беларусь 1" і спадарожнікавага "Беларусь 24". Пуцёўку на дзіцячы песенны форум аспрэчвалі 8 сольных выканаўцаў і 2 вакальныя калектывы. Вынікі шоу і першае інтэрв'ю нашага голасу дзіцячага "Еўрабачання" ў рэпартажы Дар'і Тарасавай.

Жывы вакал і толькі адзін дубль для таго, каб упэўніць гледачоў і журы аддаць свой голас. Фінал нацыянальнага адбору, паводле слогана будучага дзіцячага "Еўрабачання" Light up, запаліў на сцэне "студыі 600" творчы патэнцыял юных здольнасцяў. Дызайнерскія касцюмы, грым, танцы на кубах. У сценах Белтэлерадыёкампаніі да паўночы парыў дух суперніцтва.

Падтрымаць юных канкурсантаў мінулым вечарам сабраліся не толькі педагогі і бацькі, але і сапраўдныя куміры беларускіх дзяцей - "бонсцікі", новы сезон якіх 27 жніўня стартаваў у магазінах гандлёвай сеткі "Еўраопт" - афіцыйнага партнёра дзіцячага конкурсу песні "Еўрабачанне-2018". Беларускія "бонсцікі" ўручылі партнёрскія падарункі ўсім удзельнікам.

Нацыянальны адбор упершыню паказаў сваё закадравае жыццё. Ролю правадыра ў музычныя кулуары адвялі грын-рум. Тут у прамым эфіры фіналісты дзяліліся сваімі эмоцыямі пасля выступленняў і адказвалі на пытанні вядучых.

Флэшбэк у прамым эфіры. За бэкстэйдж адказвалі тыя, хто ўжо адстойваў гонар краіны на песенным форуме - Руслан Асланаў і Хелена Мерааі. Нацыянальны адбор аб'яднаў удзельнікаў дзіцячага "Еўрабачання" розных гадоў, выступіць змаглі і тыя, хто сёлета не ўвайшоў у запаветны топ-10.

Голас дзіцячага "Еўрабачання" выбіралі тэлегледачы і калегія журы. Ацэнкі экспертаў і публікі сумаваліся і выводзіліся на электроннае табло.

Ён - адзіны, хто спяваў тройчы. Ніякіх парушэнняў правілаў. У пачатку выступлення ў Даніэля Ястрэмскага на некалькі секунд знік гук. Хлопец не разгубіўся, а зноў загучаў у эфіры, што яшчэ больш умацавала яго шанцы на перамогу. Безумоўны лідар, паводле версіі гледачоў, са сваёй песняй Time Ястрэмскі атрымаў больш як 9 тысяч галасоў па выніках тэлефоннага і смс-галасавання. У суме з меркаваннем экспертнага журы набраў 16 балаў і ўзначаліў турнірную табліцу.

У кулуарах дзіцячага "Еўрабачання" юнака ахрысцілі беларускім Джасцінам Біберам. У Год малой радзімы ён наладзіў маштабны проматур па 12-ці гарадах Беларусі ў падтрымку сваёй кампазіцыі, прэзентаваў прыхільнікам кліп на конкурсную Time і абзавёўся шматтысячнай групай падтрымкі ў сацыяльных сетках. У свае 14 Даніэль ужо значная фігура ў музычных колах, на яго рахунку перамогі ў міжнародных форумах, а за плячыма навучанне ў Акадэміі Ігара Крутога. Даніэль-Алекс - гэта другое імя юнага вакаліста - нарадзіўся ў ЗША. Зараз ён жыве і вучыцца ў Мінску.

У выканаўца ўсяго тры месяцы, каб унесці змяненні ў конкурсны нумар. Да вакальнага шоу Даніэля-Алекса рыхтуе Вольга Драздова, педагог, які ведае, як спяваць у перыяд галасавой мутацыі. Выхаванцы зорнага настаўніка ўжо прадстаўлялі нашу краіну на дзіцячым "Еўрабачанні". Што час падкажа Даніэлю Ястрэмскаму - даведаемся на самім конкурсе. 25 лістапада дзіцячы песенны форум другі раз прыме наша "Мінск-Арэна".