Падвойны юбілей святкуе Уладзімір Пракапцоў

Ахутаны магіяй лічбы 8. Падвойны юбілей сёння святкуе вядомы дзякуючы свайму індывідуальнаму стылю творчы чыноўнік Уладзімір Пракапцоў. Мастаку 65! 20 з іх ён на чале Нацыянальнага мастацкага музея, аднаго з самых папулярных у нашай краіне. Разам з Пракапцовым храм твораў высокага мастацтва перажывае эпоху Адраджэння і становіцца сапраўдным брэндам Беларусі. Вольга Мядзведзь працягне.

У юбілейныя 8:08 раніцы 8.08 майстар асабіста сустракае сваіх гасцей і праводзіць экскурсію па аўтарскім вернісажы. Маляўнічая "Мая Беларусь" у 30 палотнах, апошняму з якіх менш за суткі. Мастацкую рэтраспектыву імяніннік Пракапцоў сціпла размясціў у пераходнай галерэі другога корпуса Нацыянальнага мастацкага, што таксама яго заслуга, а ў будаўніцтве і самы грандыёзны праект - музейны квартал. Дарэчы, першую выставу ў мініяцюрным горадзе высокага мастацтва адкрыюць ужо да II Еўрапейскіх гульняў.

20 гадоў Уладзімір Пракапцоў кіруе музеем і менавіта дзякуючы яму аб нашым мастацтве ведаюць і на захадзе, і на ўсходзе кантынента. Музей Ватыкана ўбачыў сакральныя шэдэўры, адрэстаўраваныя ў майстэрнях Нацыянальнага мастацкага, а кітайскія сябры пазнаёміліся з творамі сучасных аўтараў.

Фонды Нацыянальнага мастацкага музея - гэта каля 30 тысяч экспанатаў, 4 % з якіх выстаўляюцца, пры сусветнай практыцы 3. Збор папаўняецца штогод, часам зусім незаўважна для знатакоў. Да таго ж асветніцкі цэнтр актыўна вяртае страчаныя за ваенныя гады каштоўнасці. Па гэтай прычыне і мастака Пракапцова часцей можна сустрэць у філіялах або галерэях калег.

А гэта праца створана сям'ёй Пракапцовых яшчэ падчас пошуку аўтарскага стылю мастака-пачаткоўца. 45 гадоў таму "Матулін пачастунак" сапраўды прыгатавала мама Уладзіміра, а стол сабраны бацькам, і ўсё на малой радзіме ў вёсцы Жгунская Буда. Тады аўтар толькі марыў, што працы яго, выпускніка Віцебскай мастацка-графічнай школы, папоўняць фонды і прыватныя калекцыі па ўсім свеце.