Фальклорны тэатр "Медуніца" адзначае 20-годдзе

Фальклорны тэатр "Медуніца" адзначае 20-годдзе. Удзельнікі творчага калектыву - будучыя медыкі, студэнты Беларускага дзяржаўнага медыцынскага ўніверсітэта.

Што аб’ядноўвае юных медыкаў і фальклорны тэатр? Беларускі дзяржаўны медыцынскі універсітэт. Адсюль і назва "Мед.уні.ца". Педагогі разам са студэнтамі спяваюць, танчаць і ладзяць музычныя спектаклі.

Ірына Сляпцова кіруе студэнцкім калектывам амаль з моманту яго заснавання. У свой час планавала быць медыкам, але вырашыла набыць творчую прафесію ў педуніверсітэце імя Максіма Танка на факультэце народнай культуры.

Будучыя стаматолагі, педыятры, студэнты лячэбнага факультэта, фармацэўтычнага, медыка-прафілактычнага. Усяго больш за 30 артыстаў у студэнцкім фальклорным тэатры.

Трэцякурснік Марк Губскі са шматдзетнай сям’і прыехаў у Мінск паступаць на стаматолага з горада Жлобіна. Акрамя здольнасцей медыка, знайшоў у сябе і артыстычныя.

А вось Алена Радзькова - старшы выкладчык медуніверсітэта. Разам са студэнтамі развучвае народныя і абрадавыя песні, удзельнічае у кожнай пастаноўцы "Медуніцы".

Да творчага юбілею тэатра падрыхтавалі казку “Скарб” паводле твора Уладзіміра Караткевіча. Літаратурную прозу з рускай мовы пераклалі на вершаваную беларускую, дадалі харэаграфічныя і вакальныя нумары. Атрымалася музычна-тэатралізаванае свята.