Фінішавалі творчыя стажыроўкі беларусаў замежжа

Фінішавалі творчыя стажыроўкі беларусаў замежжа. Тыдзень знаходжання ў нашай краіне 39 прадстаўнікоў беларускіх дыяспар і грамадскіх аб'яднанняў розных краін завяршылі майстар-класамі па народных рамёствах. Урокі вышыўкі і ганчарства, пляцення паясоў і лозапляцення, вырабу абярэгавай лялькі і батлеечнага мастацтва госці атрымалі ў Лагойскім раёне. Мясцовы дом рамёстваў і яго майстры падарылі землякам незабыўныя ўрокі старадаўніх традыцыйных промыслаў.

Самымі запатрабаванымі майстар-класамі для землякоў замежжа сталі... кулінарныя. Лагойскія кухары паказалі прысутным унікальны спосаб прыгатавання дранікаў на калодзе. Бульбяныя аладкі гатавалі ўсе разам. Набытыя навыкі і падарункі ад лагойскіх майстроў беларусы замежжа павязуць у краіны свайго цяперашняга знаходжання.