Гомельскія мытнікі заснавалі музей гісторыка-культурных каштоўнасцяў

Унікальнасць экспазіцыі ў тым, што некалі яе экспанаты былі кантрабандай, якую зламыснікі спрабавалі правезці праз Беларусь. Убачыць у музеі можна археалагічныя артэфакты, прадметы мастацкай творчасці, унікальныя іконы і іншыя рарытэты. Увогуле гомельскімі мытнікамі за час існавання службы выратаваны тысячы гісторыка-культурных каштоўнасцяў. Некаторыя з іх ва ўнікальным музеі ўбачыла Ганна Кавалёва.

Ікона "Захар і Лізавета" - другая палова XIX стагоддзя. Сёння гэтыя іконы ўваходзяць у склад музейнага фонду Рэспублікі Беларусь і не толькі і належаць да катэгорыі найболей каштоўных музейных прадметаў.

Гэтыя рарытэты ў свой час былі кантрабандай. Іх спрабавалі правезці праз беларускую мяжу, каб потым прадаць ці разабраць на запчасткі. Ад цяжкай долі іх выратавалі мытнікі. Унікальныя іконы, гадзіннікі, фотаапараты. Побач - статуэтка Хатэя - старажытнакітайскага бога шчасця. Праўда, свайму былому ўладальніку замест шчасця яна прынесла судзімасць. Цяпер драўляны выраб - частка музея, які заснавала Гомельская мытня.

Яшчэ адзін унікальны прадмет - біўні маманта. Зламыснікі схавалі іх сярод бярвення і спадзяваліся, што розніцу мытнікі не заўважаць. Аднак экспертная ацэнка злачынную схему раскрыла.

Біўні вымерлай жывёліны былі распілаваныя. З Якуціі праз Беларусь іх спрабавалі правезці ў Еўропу. Кантрабандысты планавалі зрабіць з іх сувеніры. Дарэчы, такіх унікальных экспанатаў у музеі мытні - больш за 300. Унікальным можна назваць і сам музей: у краіне такіх толькі два. Дарэчы, частка знаходак на мяжы паступае ў буйныя музеі краіны. Так, амаль у кожнай экспазіцыі палаца Румянцавых і Паскевічаў ёсць такі прадмет.

Ахова мяжы не спыняецца ні на хвіліну. Адзін з апошніх фактаў затрымання кантрабанды - старадаўні гадзіннік, які спрабавалі вывезці з Украіны. Корпус прадмета быў упрыгожаны адліванымі ўстаўкамі і фігурамі з металу.

Зараз у экспертнай лабараторыі мытні знаходзяцца дзве карціны. Паводле папярэдніх ацэнак, яны могуць з’яўляцца арыгінальнымі работамі знакамітага Аляксея Саўрасава. Увогуле за час існавання Гомельскай мытні былі выратаваныя тысячы прадметаў, якія маюць гісторыка-культурную каштоўнасць. Некаторыя з іх у далейшым сталі гонарам музейнага фонду Беларусі.