Лялечнаму тэатру - 80! Юбілей аб'яднаў у абноўленай зале

Архіўныя кадры з прэм'ернымі спектаклямі, творчыя дыялогі з артыстамі і музычныя мініяцюры. Менавіта ў такім фармаце заслужаны калектыў Беларускага дзяржаўнага тэатра лялек адзначыў свой 80-ы дзень нараджэння. З круглай датай супрацоўнікаў тэатра павіншаваў і Кіраўнік дзяржавы. Гісторыя лялечнага пачалася ў Гомелі, пазней тэатр перабраўся ў Мінск і заняў сваё месца ў топе вядучых калектываў краіны. Ніякіх жанравых і ўзроставых абмежаванняў. Усяго ў рэпертуарнай афішы 22 спектаклі, у тым ліку частка пастановак арыентаваная на старэйшае пакаленне. У сваіх работах заслужаны калектыў Рэспублікі Беларусь часта звяртаецца да літаратурнай класікі - Коласа, Купалы, Булгакава, Шэкспіра.

Да канца месяца ў афішы лялечнага юбілейны марафон. На сцэне пакажуць лепшыя спектаклі тэатра за гісторыю існавання. Не абыдзецца і без гучных прэм'ер. Ужо ў снежні лялечнікі прэзентуюць юнаму гледачу работу "Хлопчык, які плаваў з піраннямі" паводле твора англійскага сучасніка Дэвіда Алманда.