Купалаўскі музей адраджае памяць пра Меера Аксельрода

Мастак, які не ўпісваўся ў правілы эпохі сацрэалізму, а таму быў ёю забыты. У Літаратурным музеі Янкі Купалы праходзіць выстава Меера Аксельрода - вядомага мастака, чые працы сёння знаходзяцца ў 80 краінах свету, у тым ліку Траццякоўскай галерэі і музеі Пушкіна. Выхадзец Беларусі, ён усё жыццё памятаў аб малой радзіме і прысвяціў ёй большую частку сваіх прац. Гэтай выставай Купалаўскі музей адраджае памяць пра выдатнага земляка.

Меер Аксельрод - ураджэнец Маладзечна. Нарадзіўся ў часы, калі ў Беларусі закладалася самастойная школа яўрэйскага мастацтва, увасобленая Шагалам, Суціным, Цадкіным. Аксельрод увайшоў у новае пакаленне мастакоў, якое прадоўжыла іх традыцыю. Ён вучыўся ў Мінску, тут жа ў 20-ых адбылася першая выстава, якая стала для яго лёсавызначальнай: Аксельрода заўважыў Павел Фларэнскі і запрасіў у вышэйшыя мастацкія майстэрні Масквы. Да пачатку 30-ых Аксельрод лічыўся паспяховым мастаком, почырку якога было ўласціва спалучэнне авангарда і самабытнага нацыянальнага каларыту.

З шасці тысяч адзінак работ Аксельрода - вялікая частка - жывапіс і графіка - прысвечаныя яго мястэчку. Сучасным беларусам дадзена магчымасць убачыць кніжную графіку мастака. На выставе - малюнкі Аксельрода да твораў Купалы, Бядулі, Коласа.

Малюнкі да казак Бядулі, да коласаўскай трылогіі "На ростанях" - усяго 85 ілюстрацый. За кніжную графіку Аксельрод узяўся ў 50-ых, ужо сталым майстрам. На выставе - і ўрыўкі з серыі работ, прысвечаных Мінску.

За некалькі гадоў да смерці Аксельрод напісаў самы лепшы, на думку знаўцаў, цыкл. "Успаміны пра стары Мінск" - праект, пабудаваны на алоўкавых замалёўках, якія юны мастак рабіў яшчэ ў часы студэнцтва, калі на лета з Масквы прыязджаў да бацькоў у гэты горад. Праўда, па работах Аксельрода сённяшнюю беларускую сталіцу не пазнаць - затое можна пабачыць, як яна выглядала да вайны.