Не стала майстра купалаўскай сцэны Мікалая Кірычэнкі

Тэатральны свет смуткуе. Напярэдадні вечарам не стала акцёра тэатра і кіно, педагога, прафесара, майстра купалаўскай сцэны Мікалая Кірычэнкі. Яму было 72. Спачуванне родным і блізкім народнага артыста Беларусі накіраваў Прэзідэнт. Мікалай Кірычэнка доўга змагаўся з хваробай. Да апошняга выходзіў на сцэну. Набраў акцёрскі курс. Рыхтаваўся і да новых роляў, але не змог перамагчы хваробу.

Ён пайшоў у адпачынак. Водпуск. Толькі паўтара тыдня таму купалаўцы закрылі сезон. Грымёрка на трэцім паверсе тэатра. Стол Кірычэнкі, дзе артыст пакінуў некалькі фотаздымкаў і абразок. Ён мусіў вярнуцца. Праз месяц.

У верасні Кірычэнка планаваў пачаць рэпетыцыі новай ролі ў спектаклі "Каты". Апошняе жаданне артыста. Прэм’ера была запланавана на снежань.

У прафесію Кірычэнка прыйшоў з другой спробы. Першы раз іспыты скончыліся на другім туры. Пайшоў працаваць на завод. І год займаўся на падрыхтоўчых акцёрскіх курсах, хаця бацькі былі ўпэўнены, што сын ездзіць у палітэх, будзе сапраўдным савецкім інжынерам. Бацькоў паставіў перад фактам. Пасля заканчэння вучобы два гады працаваў у Брэсце, у 1971 прыйшоў у трупу Купалаўскага. Дзясяткі вобразаў. Непараўнальны Ягайла ў "Вітаўце", Падкаморны ў "Пане Тадэвушы", Васіль у "Вечары".

Прафесар Акадэміі мастацтваў - яшчэ летась Мікалай Кірычэнка набраў свой апошні курс. За 30 гадоў педагог Кірычэнка выпусціў сотні акцёраў. Многія побач з ім выходзілі на сцэну. У яго вучыліся адказнасці і вытрымцы. Свае апошнія спектаклі майстар іграў са зламанай ключыцай і на абязбольвальных.

Толькі некалькі дзён таму Мікалай Кірычэнка скончыў здымкі ў кіно. Яно, дарэчы, прыйшло ў жыццё акцёра даволі позна - спраўдзілася прадказанне педагога Арлова. Але сталага, мудрага, пазнавальнага Кірычэнку з яго фактурнай знешнасцю запрашалі вельмі часта. Яго тыпаж прывабліваў многіх рэжысёраў. Ён і Берыя ў "Жніўні 44-га", і генерал у "Прывітанні ад Кацюшы", і доктар у "Паляванні на гаўляйтара".

Сцэну Купалаўскага рыхтуюць да развітання з артыстам. На яе ён выходзіў 47 сезонаў. Не здраджваў падмосткам і калі займаўся адміністрацыйнай справай - быў дырэктарам тэатра. Развітанне з народным артыстам пачнецца заўтра а 10 раніцы. Мікалая Кірычэнку пахаваюць на цэнтральнай алеі Усходніх могілак Мінска.