Плануем культурныя выхадныя з рубрыкай "Праменад"

Заўтра ў Верхнім горадзе ў Мінску - Дзень шматнацыянальнай Расіі, а ў Мастацкай галерэі Савіцкага - дзве новыя выставы.

Плануем культурныя выхадныя з рубрыкай Ларысы Гулякевіч "Праменад". У Мастацкай галерэі Савіцкага адразу дзве новыя выставы. У экспазіцыі адной з іх - фотаздымкі легендарнага фотамастака Антанаса Суткуса. Людзі Літвы з рознымі характарамі, тварамі і ў розныя часы. Антанас Суткус - адзін з найбольш выбітных прадстаўнікоў гуманістычнай фатаграфіі ў Еўропе і свеце, які ў 70-х гадах ХХ стагоддзя разам з калегамі заклаў асновы літоўскай фатаграфічнай школы. Яго творчасць экспануецца ў прэстыжных галерэях па ўсім свеце. У экспазіцыі другога паверха галерэі - больш за сотню архіўных сярэбраных адбіткаў, якія ствараліся больш за 50 гадоў і аб’яднаныя ў фатаграфічны цыкл "Людзі Літвы".

Тут жа, толькі ў іншай зале галерэі Савіцкага, - 70 твораў жывапісу на аўтарскай выставе беларускага мастака Рыгора Несцерава. Адметнасць яго творчасці – уменне працаваць са святлом.

У вольнай паэтычнай форме піша свае карціны мастак Рыгор Несцераў. У яго творах псіхалагічная вытанчанасць і глыбіня, а святло, нібы жывая істота перацякае з аднаго стану ў іншы. Рыгор Несцераў з'яўляецца і тэарэтыкам мастацтва і культуралогіі. Яго творы ў фондах музеяў Беларусі, ЗША.

А ў Верхнім горадзе пачаўся сезон мерапрыемстваў оpen air. Кожныя выхадныя канцэрты і святы нацыянальных культур. Песні, карагоды, нацыянальная кухня розных народаў, аб'яднаных пад дахам Расіі – у гэтую суботу, 9 чэрвеня.

Дзень шматнацыянальнай Расіі ўключае выступленне самых яскравых творчых калектываў з Яраслаўля, Бранска, Пскова, Санкт-Пецярбурга, Валгаграда і іншых гарадоў Расіі. Не абыдзецца без майстар-класаў дэакаратыўна-прыкладного мастацтва, частавання нацыянальнымі прысмакамі і забаўных мерапрыемстваў для дзяцей. Свята прымеркавана да Дня Расіі, які святкуецца 12 чэрвеня.

Побач, у дворыку Манастырскі, пачынае працаваць праект Open air Cinema. У суботу - лірычная камедыя Георгія Данелія "Я крочу па Маскве". Нясумных выхадных і да наступнай пятніцы.