Продаж білетаў на "Славянскі базар" стартуе 18 лютага

Білеты на ўсе праекты "Славянскага базару" ў Летнім амфітэатры паступяць у продаж ужо сёння, 18 лютага. На працягу трох дзён іх можна набыць толькі ў касах Віцебска. А пасля - па ўсім свеце. Падрабязнасці расказалі журналістам у дырэкцыі фестывалю. Нагадаем, сёлета трыццаць першы форум мастацтваў пройдзе з 14 па 17 ліпеня. Дадатковыя праекты запланаваны на 13 і 18 ліпеня. "Славянскі базар" парадуе багаццем зорак. З юбілейным канцэртам у фестывальны Віцебск прыедзе Тамара Гвердцытэлі. У пашыраным фармаце будзе прапанавана творчая праграма пад эгідай Саюзнай дзяржавы, а для моладзі рыхтуюць мноства праектаў у фармаце open air.

Дзіцячаму музычнаму конкурсу сёлета 20 гадоў. Дырэкцыя фестывалю плануе сабраць максімальна поўны першы састаў журы песеннага спаборніцтва. Не менш інтрыгуючым будзе і дарослы конкурс XXXI "Славянскага базару".