Рэстаўрацыя Каложскай царквы XII стагоддзя ў Гродне падыходзіць да завяршэння

Цалкам заменена паўднёвая драўляная сцяна, якая пацярпела ў XIX стагоддзі ад паводкі. Будаўнікі ўжо пачалі добраўпарадкаванне тэрыторыі вакол храма. Вядзецца замена камунікацый і брукаванне пешаходных дарожак. Аднак нават такія малаважныя работы праходзяць строга пад наглядам археолагаў. Спецыялісты фіксуюць наяўнасць культурнага пласта і будуць вызначаць каштоўнасць магчымых знаходак. Завяршыць добраўпарадкаванне плануюць да канца лета. Паколькі аб'ект мае не толькі гістарычную і культурную каштоўнасць, але і з'яўляецца месцам прыцягнення турыстаў, тут плануюць цалкам замяніць асвятляльныя канструкцыі. Гэта дазволіць павысіць прывабнасць храма ў вячэрні і начны час. Паралельна вядуцца работы і па ўмацаванні схілу, а таксама па азеляненні тэрыторыі.

"У прынцыпе ўсе работы, якія вяліся да гэтага і зараз, яны ўжо вядуцца з прыцягненнем археолага. Нават зараз робіцца ўстаноўка другога пажарнага гідранта, бо храм напалову драўляны. Гэта было патрабаванне абавязковае згодна з нормамі. Нават тут даволі далёка ад царквы, бліжэй да прыходскага дома - гэта ўсё роўна ахова культурнага пласта. Археолаг прыехаў на дадзены від работ".

Наступны этап рэстаўрацыі Каложскай царквы прадугледжвае абнаўленне ўнутранага ўбрання. Спецыялісты плануюць аднавіць усе драўляныя элементы. Цалкам будзе перароблены балкон, які пабудавалі яшчэ ў пачатку 90-х мінулага стагоддзя, калі гістарычны аб'ект перадалі вернікам.