З Мінска пачаліся святкаванні Дня беларускага пісьменства

Сёння з Мінска пачаліся святкаванні Дня беларускага пісьменства. І хаця сталіцай форуму 1 і 2 верасня будзе горад Іванава Брэсцкай вобласці, зачын святу роднага слова дае навукова-асветніцкая экспедыцыя "Дарога да святыняў". Яна пачынае свой шлях з беларускай сталіцы, а далей ідзе па ўсёй краіне.

Пра чарговае, юбілейнае, паломніцтва - Наталля Бардзілоўская. Дарогай да святыняў яны ідуць 25 гадоў. Пісьменнікі, навукоўцы, святары, прадстаўнікі творчай інтэлігенцыі. Сярод удзельнікаў ёсць тыя, хто чвэрць стагоддзя не здраджвае экспедыцыі (напрыклад, артыстка Марыя Захарэвіч ці пісьменнік Анатоль Бутэвіч). Таксама пастаянным пунктам збору людзей, месцам старту акцыі з'яўляецца Свята-Духаў кафедральны сабор Мінска.

Па традыцыі духоўнае паломніцтва пачынаецца ранкам і з малення. У гонар асветнікаў ладзіцца спецыяльнае набажэнства, на якім гучаць добрыя пажаданні на дарогу. Вандроўнікам уручаюцца духоўныя рэліквіі: праз гарады і вёскі яны пранясуць Жыватворны агонь ад Труны Гасподняй з Іерусаліма, асвячоны хлеб і апякунку экспедыцыі - ікону Божай Маці Загор'е-Сталавіцкую.

За 25 гадоў існавання экспедыцыя "Дарога да святыняў" пераадолела больш за 30 тысяч кіламетраў. Яе хрэсныя хады аб'ядналі амаль 3 мільёны чалавек. Удзельнікі асветніцкай акцыі пасадзілі звыш 3 тысяч дрэў. Адно з самых прыгожых і значных мерапрыемстваў дзеі - закладка садоў малення ці райскіх садоў - сёлета закране горад Іванава. Кожны год у паломнікаў свой маршрут, як і ў свята беларускага пісьменства - свая сталіца.

Ужо сёння днём экспедыцыя прыбудзе ў Лагойск. За 5 экспедыцыйных дзён паломнікі наведаюць дзясятак гарадоў: Дзяржынск, Мар'іну Горку, Лагішын, Целяханы. У суботу мінская асветніцкая дэлегацыя прыбудзе ў сёлетнюю сталіцу Дня беларускага пісьменства, каб далучыцца да агульных святкаванняў.