Тры карціны Надзеі Хадасевіч-Лежэ вярнуліся на радзіму - у Беларусь

Графічныя малюнкі парыжанкі (ураджэнкі Віцебшчыны) набыты пры фінансавай падтрымцы ганаровага консула Беларусі ў Лазане Андрэя Нажэскіна і пасольства ў Швейцарыі. Работы прыбылі ў Мінск у ліпені. Сёння ў рамках "Вераснёвай ночы", прымеркаванай да Дня горада, перадаюцца ў дар Нацыянальнаму мастацкаму музею. У фондах ужо ёсць некалькі супрэматычных работ мастачкі, а таксама каля 200 злепкаў шэдэўраў сусветнага мастацтва з Луўра. У сезоне 2018 - тры графічныя малюнкі, а гэта ўжо 4 вяртанне ў нацыянальныя фонды культурнай спадчыны выхадцаў з Беларусі. У перспектыве ў Нацыянальным мастацкім з'явіцца яшчэ адно палатно Надзеі Лежэ, напісанае алеем.

Сяргей Вечар, намеснік гендырэктара па рэстаўрацыі і фондавай працы Нацыянальнага мастацкага музея Беларусі: "Яны так і прыбылі - у рамах, паспарту, усё роднае, што называецца. Мы ўсё гэта разбяром, паглядзім, таму што так бывае часам, што мы можам знайсці нейкія надпісы, аўтографы. Гэта яшчэ больш узбагаціць вартасць канкрэтных работ".

З калекцыі Нацыянальнага мастацкага таксама выстаўлены 4 абстрактныя шаўкаграфіі Надзеі Хадасевіч-Лежэ. Пасля ўрачыстай перадачы для ўсіх ахвотнікаў адбудзецца лекцыя аб жыцці і творчасці мастачкі.