Замілавальныя вобразы Беларусі ў адзіным вернісажы сабрала мастак Ірэна Гудзіеўская

Якая яна - душа Беларусі? Луг, лес, возера ці лён з пралескамі... Замілавальныя вобразы нашай краіны ў адзіным вернісажы сабрала мастак Ірэна Гудзіеўская. На больш чым 80 фотаработах майстар адлюстравала ўсю прыгажосць, гонар і сімвалы Сінявокай. Прысвяціла работы Году малой радзімы.

Аб прыгажосці наваколля раскажа Ларыса Гулякевіч. Шукаць сімвалы роднай зямлі для Ірэны Гудзіеўскай проста. Палессе і пушчы, палацы і вежы, хлебныя палі, васількі, лён. Яна вырасла на хутары сярод маляўнічых мясцін і ўвасобіла любоў да сваёй малой радзімы ў новым фотапраекце.

Пах зялёнай травы, смак суніц, шолах буслінага крыла…Усё гэта складальнікі дзяцінства, родных мясцін, генетычнай народнай памяці. Сімвалы Беларусі, з чаго яны складаюцца, сучаснай візуальнай мовай расказвае Ірэна Гудзіеўская. За кожным знакам і імгненнем асабіста палявала і назірала з фотакамерай.

Яна ў прафесіі больш за 30 гадоў. Тэхнічныя магчымасці мяняюцца, а падыход да жывой фатаграфіі застаецца традыцыйным. Аніякага фоташопа, здымкі з натуры ў любое надвор'е. Завіруха з мінус 20, усход летняга сонца а пятай раніцы, дакладны час цвіцення і выспявання льну. Як расце буслік, і чым частуецца зубр. Каб рэалізаваць творчую задумку, аўтару часам патрэбна некалькі дзён ці нават месяц. За кожным кадрам -цэлая гісторыя.

Фотапраект "Сімвалы Беларусі. У пошуках..." - працяг вялікай аўтарскай тэмы «Зачараванне», якая пачалася больш за 8 гадоў таму. Тады сярод сімвалаў беларускай прыроды быў прапанаваны яшчэ адзін - прыгажосць беларускай жанчыны.

Кожнаму з дванаццаці сімвалаў Беларусі прысвечаны казкі для дзяцей. 12 твораў сталі своеасаблівым дапаўненнем фотапраекта.

Мілагучныя песні, паказ дзіцячага льнянога адзення, хлеб і пернікі з насеннем льну і пялёсткамі васількоў. Беларускія сімвалы можна бачыць, чуць і нават пакаштаваць.