У Мінску развіталіся з Аляксандрам Кулінковічам

У Мінску сёння развіталіся з Аляксандрам Кулінковічам. Лідар культавага "Нейра Дзюбеля" і "генерал айчыннага рока" памёр напярэдадні. Яму было 46. Прычынай смерці ўрачы назвалі недалечаную пнеўманію. Першыя канцэрты "Нейра Дзюбель" пачаў даваць у пачатку 90-х. А ўжо ў 1998-м група атрымала самую прэстыжную ўзнагароду беларускага андэграўнда - рок-карону. Кулінковічу яе ўручаў асабіста Уладзімір Мулявін. Аляксандр Кулінковіч працаваў калумністам у "СБ. Беларусь сёння", а таксама не раз станавіўся госцем нашых студый.

Адзін з самых папулярных вынікаў такіх візітаў - сумеснае выступленне з Ксеніяй Сітнік - было запісана тут у 2010-м. Брутальны рокер і пераможца дзіцячага "Еўрабачання" выканалі хіт "Мы разам". Сябры і фанаты ласкава звалі лідара "дзюбеляў" дзядзькам Сашам - у жыцці галоўны панк краіны быў простым і вельмі сціплым чалавекам.