Выстава нацыянальных касцюмаў адкрылася ў Барысаве

Японскае кімано, мексіканскае самбрэра і, вядома, беларуская вышыванка. Выстава "Прыгажосць традыцый або лялькі ў нацыянальным касцюме" адкрылася ў адной з залаў Барысаўскай цэнтральнай раённай бібліятэкі. У экспазіцыі амаль 200 цацачных персанажаў, кожны прадстаўляе сваю краіну.

У аснове выставы - лялечная калекцыя Алёны Роўбы.

"Лялечнае ўладарства" ў Барысаўскай бібліятэцы пануе даўно. Ад першай выставы, якую ладзіла мясцовая калекцыянер Алёна Роўба, прайшло некалькі гадоў. За гэты час экспанаваліся яшчэ некалькі яе праектаў і з'явілася нават свая "Лялечная альтанка" - зала, дзе калекцыйныя прадметы захоўваюцца стацыянарна, дзе праходзяць экскурсіі для ўсіх ахвотнікаў і майстар-класы для дзяцей.

Цяпер лялечную тэматыку ў бібліятэцы падтрымалі новым праектам. "Прыгажосць традыцый: лялькі ў нацыянальным касцюме" - гэта выстава з 200 маленькіх мадэлей у строях розных краін. Малдова, Чэхія, Азербайджан, японскае кімано, мексіканскае самбрэра і іспанскае балеро. Акрамя эстэтыкі, гэтыя экспанаты выконваюць асветніцую задачу. Маленькія дакладныя копіі рэальных нацыянальных строяў знаёмяць з гісторыяй і культурай касцюма шматлікіх краін свету.

Адзін з самых цікавых экспанатаў - міні-варыянт, адзін у адзін сувенірная копія знакамітай інданезійскай драўлянай лялькі, якая выкарыстоўваецца ў тэатралізаваных паказах. Вырабляюць гэты цуд на востраве Ява.

Элементы іранскага і індыйскага жаночых касцюмаў і камізэлька з чаравікамі з Пакістана. І, зразумела, наш, беларускі нацыянальны касцюм прадэманстраваны на выставе нешматліка, але аўтэнтычна.

Выстава нацыянальнага касцюма - гэта і спецыяльна падабраная літаратура, і набор

малюнкаў, якія падмацоўваюць тэму. Праект будзе працаваць да канца лістапада.