Беларускія спартсменкі занялі трэцяе месца ў эстафеце на чэмпіянаце Расіі па біятлоне

Беларускія біятланісткі сталі прызёрамі эстафетнай гонкі на чэмпіянаце Расіі 2025 года, які праходзіць у Ханты-Мансійску, паведамляе БЕЛТА.

Удзел у жаночай эстафеце прынялі 11 квартэтаў з розных рэгіёнаў Расіі, а таксама дзве чацвёркі з нашай краіны. У каманду "Беларусь-1" увайшлі Ганна Сола, Ксенія Варабей, Ірына Шаклеіна і Дзінара Смольская. Стартавы этап Сола завяршыла на першым месцы, пры гэтым Ганне не перашкодзіў нават адзін штрафны круг. Варабей таксама зазірнула на 150 лішніх метраў дыстанцыі і перадала эстафету ўжо чацвёртай праз 47 секунд пасля лідара. Па ходзе трэцяга этапа Шаклеіна падняла нашу каманду на другую пазіцыю, а на заключным адрэзку гонкі Смольская прапусціла наперад адну саперніцу і ў выніку фінішавала трэцяй.