Беларускім трыумфам завяршыўся Кубак Саюза біятланістаў Расіі ва Уфе

Чатыры залатыя ўзнагароды, дзве сярабраныя і дзве бронзавыя - такія вынікі беларусаў на Кубку Саюза біятланістаў Расіі. Ён завяршыўся 16 сакавіка мас-стартамі і золатам для нашага Мікіты Лобастава. Узровень падрыхтоўкі беларусаў ацанілі многія спецыялісты. А яшчэ хлопцы ўпісалі шэраг прыгожых перамог у сваю спартыўную біяграфію.

З трыумфальным выступленнем нашу зборную павіншаваў кіраўнік НАК. Віктар Лукашэнка асабліва адзначыў, што ў гэтых няпростых умовах неабходна згуртавацца, паказаць стальны характар і сваё майстэрства на спартыўных арэнах.

Ва Уфе працавала здымачная група АТН. Падрабязнасці ў Андрэя Казлова.

Гэты мас-старт з прыстаўкай мега-, бо адразу шэсць дзясяткаў амбіцыйных мужчын ляцяць на дыстанцыю змагацца за ўзнагароды. У гэтай гушчы спартыўнай барацьбы і характараў звіняць медалі і Алімпіяд, і чэмпіянатаў свету. Адна, дарэчы, наша - Смольскага ў Пекіне. Але ў гэты заключны дзень уфімскіх стартаў быў бездакорны іншы беларус - Мікіта Лобастаў. Ён выбіў дваццатку на рубяжах і ўзяў золата.

Менавіта хлопцы з Рэспублікі Беларусь устроілі парад перамог і ўвагу мясцовай аўдыторыі сваім талентам забіралі сабе. Золата мужчын тут выключна ў беларускай скарбонцы. Смольскі, двухразовы чэмпіён Кубка Саюза біятланістаў Расіі, сыходзіць на заслужаны адпачынак.

На дэсерт для перапоўненых трыбун спарткомплексу пакінулі жаночы мегамас-старт. Перамагла Вікторыя Сліўко. Але Дзінара Алімбекава і тут не абышлася без кветкавай цырымоніі - кветкі ёй вельмі пасуюць.

Біятлонны комплекс ва Уфе стаў сапраўды гасцінным для беларускіх біятланістаў. У нашых хлопцаў 4 медалі найвышэйшай вартасці. Далей зборная Беларусі пераязджае ў Цюмень на чэмпіянат Расіі, які таксама набыў адкрыты статус.