Ігар Мошкін: Сувязі паміж Беларуссю і Украінай варта пашыраць

Ва Украіне на сёння пражывае каля 240 тысяч беларусаў. Працу з нацыянальна-культурнымі аб'яднаннямі, пытанні супрацоўніцтва з суайчыннікамі за мяжой ўзнімалі сёння на сустрэчы ў Мінску. Упаўнаважаны па справах рэлігіі і нацыянальнасцей Аляксандр Румак сустрэўся з намеснікам старшыні Усеўкраінскага саюза беларусаў Ігарам Мошкіным. Ён адзначыў, што ва Украіне рэгулярна праходзяць мерапрыемствы па папулярызацыі беларускай культуры і мовы, нашых народных традыцый і звычаяў. Дзень Незалежнасці Беларусі, Дзень роднай мовы і, вядома, 9 Мая - гэтыя святы беларусы адзначаюць па ўсім свеце.

На думку Ігара Мошкіна, нягледзячы на тое што Украіна ідзе па еўрапейскім вектары развіцця, эканамічныя сувязі паміж нашымі краінамі варта пашыраць. На гэтай жа сустрэчы абмяняліся памятнымі падарункамі. Прадстаўнік Усеўкраінскага саюза беларусаў павязе з собою сувеніры, кнігі і нацыянальныя касцюмы для членаў беларускіх дыяспар у Чарнігаве, Кіеве і Міргарадзе.