Любоў Чаркашына стала галоўным трэнерам нацыянальнай каманды Беларусі па мастацкай гімнастыцы

Вядомая беларуская гімнастка Любоў Чаркашына прызначана галоўным трэнерам нацыянальнай каманды Рэспублікі Беларусь па мастацкай гімнастыцы, паведамляе прэс-служба Мінспорту.

Чаркашына шырока вядомая ў спартыўным свеце як адна з найбольш паспяховых беларускіх гімнастак. У яе актыве - бронзавы медаль Алімпійскіх гульняў 2012 года ў Лондане, а таксама шматлікія ўзнагароды чэмпіянатаў свету і Еўропы.

На гэтай пасадзе яна змяніла Ірыну Ляпарскую, якая з 1996 года была галоўным трэнерам нацыянальнай каманды Рэспублікі Беларусь па мастацкай гімнастыцы.

З імем Ірыны Ляпарскай звязаны найбольш яркія старонкі айчыннай мастацкай гімнастыкі. За гады працы яна выхавала не адну плеяду спартсменак, якія паспяхова прадстаўлялі Беларусь на найбуйнейшых міжнародных спаборніцтвах і станавіліся прызёрамі Алімпійскіх гульняў.

Сярод вядомых выхаванак Ірыны Ляпарскай - алімпійская чэмпіёнка Марына Лобач, алімпійскія прызёры Іна Жукава, Юлія Раскіна, Любоў Чаркашына, Аліна Гарнасько і іншыя.

Фота: Мінспорту