Рубрыка "Матчбол"

Футбол, гандбол і чэмпіянат свету па веславанні на байдарках і каноэ, дзе беларусы заваявалі дзевяць медалёў, сёння ў цэнтры ўвагі спартыўнай рубрыкі “Матчбол”. Агляд найважнейшых падзей - у Станіслава Ліпскага.

Нацыянальная зборная Беларусі перад стартам Лігі нацый так і не здолела абгуляць сваіх апанентаў у таварыскіх матчах. Нічыя з Венгрыяй у актыве, паражэнне ад Фінляндыі ў пасіве. Не парадавала на мінулым тыдні і гандбольная зборная краіны.

Унічыю каманда Юрыя Шаўцова згуляла дома супраць Аўстрыі напярэдадні ў першым паядынку кваліфікацыі да чэмпіянату свету - 2019. Аднак гэты вынік усё ж трэба разглядаць як станоўчы: за дзве хвіліны да заканчэння гандбольнай сустрэчы аўстрыйцы вялі з лікам 27:25, але беларусы здолелі ўпэўнена абараняцца і перавесці матч ў нічыю 28:28.

Выдатна выступілі беларускія весляры на чэмпіянаце Еўропы, які прайшоў у Сербіі: дзевяць узнагарод заваявалі беларусы, тры з іх залатыя.

Больш за тое, Алёна Наздрова з сусветным рэкордам перамагла на дыстанцыі 500 метраў у заездзе каноэ-адзіночак. Яшчэ адна ўзнагарода найвышэйшай пробы ў актыве канаісткі Вольгі Клімавай, залатым атрымаўся і заезд байдаркі-чацвёркі для беларусаў на дыстанцыі 1000 метраў. Прозвішчы лепшых: Бялько, Федарэнка, Нікіцін і Петрушэнка. У дадатак да медалёў беларусы атрымалі максімум ліцэнзій на хатнія Еўрапейскія гульні - 2019.

У Мінску тым часам пачынаюць рыхтаваць тэрыторыю для нацыянальнага футбольнага стадыёна і самага буйнога ў краіне басейна, у якім можна будзе прымаць міжнародныя спаборніцтвы. Адпаведны ўказ падпісаў Прэзідэнт Аляксандр Лукашэнка. Стадыён з'явіцца ў раёне вуліцы Ванеева - побач з арэнай "Трактар", на Кальварыйскай будзе цэнтр плавання. Нагадаем, раней паведамлялася, што абодва гэтыя аб'екты будуць пабудаваны на грошы кітайскіх інвестараў.

На гэтым тыдні - уся ўвага футболу: у чацвер нарэшце стартуе чэмпіянат свету, зразумела, усе матчы пакажа Белтэлерадыёкампанія. У сераду падтрымліваем мужчынскую зборную Беларусі па гандболе, а ў выхадныя - жаночую баскетбольную каманду. У пятніцу ў Мінску стартуе традыцыйны мемарыял Сямёна Халіпскага. На гэтым усё, любіце спорт, і мы абавязкова яшчэ ўбачымся.