Рубрыка "Матчбол" аб спартыўных выніках беларускіх спартсменаў

"Цмокі" - "Барысфен" - афіша фінальнай серыі чэмпіянату Беларусі па баскетболе сярод мужчынскіх каманд. Уладальнікам залатых медалёў стане той клуб, які першым атрымае тры перамогі. Першая гульня супрацьстаяння пройдзе сёння ў сталіцы, пачнецца яна ў 19:00. А вось пра тое, што ўжо адбылося, раскажа рубрыка "Матчбол".

Футбол, безумоўна, у авангардзе спартыўных падзей. Салігорскі "Шахцёр" працягвае перамагаць у чэмпіянаце Беларусі: у каманды 9 вікторый запар.

Гэта лепшы вынік на старце сезона ў гісторыі айчыннага футбола. Рэкордную перамогу "гарнякі" здабылі ў супрацьстаянні з "Нёманам" у гасцях. Каманда Рамана Грыгарчука прапусціла першай, аднак здолела пераламаць ход гульні і выйграць 2:1.

Больш цікавым атрымаўся паядынак з удзелам яшчэ аднаго прэтэндэнта на залатыя медалі. БАТЭ прымаў "Рух" і ў відовішчным матчы перамог 3:2. Вырашальны гол у актыве ісландскага паўабаронцы Вілюмсана. Такім чынам пасля дзевяці тураў БАТЭ адстае ад "Шахцёра" на 7 балаў, як і мінскае "Дынама". Бела-блакітныя ў пятніцу перамаглі "Смаргонь" 2:0.

Зборная Беларусі па хакеі працягвае рыхтавацца да чэмпіянату свету. У першым паядынку спаборніцтваў у пятніцу беларусы згуляюць супраць Славакіі.

Каманда Міхаіла Захарава ўжо знаходзіцца ў Латвіі: на дадзены момант хакеісты, а таксама і астатнія ўдзельнікі планетарнага першынства на запланавай самаізаляцыі. Менавіта так арганізатары турніру вырашылі змагацца з распаўсюджваннем CОVID-19. Акрамя гэтага, гульні чэмпіянату пройдуць без гледачоў.

У апошняй таварыскай гульні перад стартам чэмпіянату беларусы, нагадаем, саступілі зборнай Казахстана 0:2. Якім атрымаецца чэмпіянат для нашай каманды, даведаемся зусім хутка. Адзначым, Ягор Шаранговіч дапаможа камандзе на турніры, а вось Андрэй Касціцын усё ж не - з-за траўмы.

На гэтым тыдні сочым за фіналам чэмпіянату Беларусі па баскетболе. "Цмокі" згуляюць супраць "Барысфена", таксама цікавімся чэмпіянатам свету па хакеі, а ў нядзелю фінал Кубка Беларусі: БАТЭ супраць "Іслачы". Усё гэта чакае гледачоў на тэлеканалах Белтэлерадыёкампаніі.