У гэтыя дні Палац тэніса прымаў чэмпіянат Беларусі

І, спадзяваемся, будучыя зоркі сусветнага тэніса сёння правялі свае вырашальныя гульні ў Мінску. У гэтыя дні Палац тэніса прымаў чэмпіянат Беларусі. Тут прайшлі фінальныя паядынкі ў мужчынскім і жаночым адзіночных разрадах. Але трэнеры, спартсмены і кіраўнікі федэрацыі зараз, вядома ж, сочаць і за гульнёй Арыны Сабаленкі. У першай ракеткі Беларусі ёсць усе шанцы выйграць у Істбарне галоўны трафей.

Уладзімір Валчкоў, капітан мужчынскай зборнай Беларусі па тэнісе: "Я мяркую, што ўсе сур'ёзныя дасягненні Арыны яшчэ наперадзе. Самае галоўнае, што яна пачала рэалізоўваць той патэнцыял, які відавочны шматлікім спецыялістам, ды і проста вялікім прыхільнікам і аматарам тэніса. Той тэніс, які яна дэманстравала ў матчах Кубка Федэрацыі супраць спартсменак топ-10, сёння пачынае рэалізоўвацца ўжо на турнірах такога найвышэйшага ўзроўню".

У чэмпіянаце Беларусі роўных сярод мужчын не было Дзмітрыю Жырмонту. У вырашальным матчы ён абгуляў Яраслава Шылу 6:3, 7:6. У жанчын Юлія Гатоўка ўзяла верх над Шалімар Тальбі - 6:1, 7:6.