Уладзіслаў Яроменка прывёз Кубак Гагарына ў Мінск

Кубак Гагарына можна было зноў убачыць у Мінску. Гэтым разам галоўны трафей КХЛ у сталіцу Беларусі прывёз абаронца і выхаванец віцебскай школы хакея Уладзіслаў Яроменка. Запаветная чаша была выстаўлена ў парку Горкага на крытым катку "Юнацтва". Любы ахвотнік мог сфатаграфавацца з гульцом абароны і тытулам, атрымаць чэмпіёнскую аўтограф-карту. Таксама на пляцоўцы працавалі розныя зоны актыўнасцяў.

У мінулым сезоне КХЛ Кубак Гагарына заваяваў магнітагорскі "Металург", які з лікам 4:0 абгуляў яраслаўскі "Лакаматыў". У складзе "сталевараў" змагаліся два беларусы.

А перш галоўны трафей КХЛ гасцяваў у Віцебску і Наваполацку. Зусім хутка клубы адправяцца ў новы шлях за Кубкам. 17-ты рэгулярны сезон пачнецца 3 верасня.