"Дзеці Беларусі - ветэранам і будучым пакаленням"

"Дзеці Беларусі - ветэранам і будучым пакаленням". Гэта агульнанацыянальны праект, які быў задуманы дабрачынным фондам Аляксея Талая і міністэрствамі адукацыі і культуры. Сэнс праекта, прысвечанага Вялікай Айчыннай вайне і Вялікай Перамозе, - аб'яднаць беларускіх школьнікаў, моладзь ва ўсеагульнае ўшанаванне памяці гераічных продкаў. А таксама далучыць падрастаючае пакаленне да стварэння маштабнага кніжнага выдання.

45 тамоў з дзіцячымі эсэ! Выданне, якое не мае аналагаў , прэзентавалі сёння ў Дзяржаўным музеі гісторыі Вялікай Айчыннай вайны. Тут жа прадставілі макет эскіза помніка, якому далі назву "Жывая памяць удзячных пакаленняў". Аўтар эскіза - беларускі скульптар Уладзімір Слабодчыкаў. У мастацкім рашэнні помніка ён выкарыстаў вобразы трохвугольнага ліста з вайны і дрэва жыцця.

У стварэнні помніка-сімвала таксама паўдзельнічалі дзеці - яны збіралі манеты, якія падчас усталявання скульптурнай кампазіцыі ўманціруюць у яе. Помнік будзе створаны ў трох аднолькавых экзэмплярах, ўстановяць яго ў трох гарадах - Брэсце, Мінску і Маскве. Удзельнікі сённяшняга мерапрыемства ў музеі вайны атрымалі памятныя падарункі - 3D-макеты будучай скульптуры.