Аляксандр Лукашэнка павіншаваў хрысціян Беларусі з Раством Хрыстовым

Католікі ўсяго свету сустрэлі Раство Хрыстова. Хрысціян Беларусі павіншаваў кіраўнік дзяржавы.

"З года ў год у гэтыя хвалюючыя і радасныя дні нашы сэрцы і душы перапаўняе чаканне цудоўнага, светлага і велічнага свята, якое накіроўвае да хрысціянскіх ідэалаў мільёны вернікаў, натхняе іх на добрыя справы. Ва ўсе часы галоўнай жыццёвай каштоўнасцю была і застаецца сям'я – кола блізкіх і родных людзей, дзе кожны клапоціцца аб кожным, дзе дзяцей вучаць радавацца, ствараць, любіць бацькоў, бацькаў дом і Радзіму. Няхай гэтымі каляднымі днямі ўсе беларусы адчуюць сябе той моцнай і адзінай сям'ёй, якая падтрымае, абароніць і дасць параду, будзе побач у горы і радасці. Няхай у дамах заўсёды пануюць мір і згода, а вера, надзея і любоў ніколі не пакідаюць вашы сэрцы", - гаворыцца ў віншаванні.

Напярэдадні вечарам святочныя набажэнствы прайшлі ва ўсіх касцёлах Беларусі. Урачыстую імшу ў Мінску, у архікафедральным саборы Прасвятой Дзевы Марыі адслужыў Мітрапаліт Мінска-Магілёўскі Юзэф Станеўскі. Раство Хрыстова - адзін з самых ушанаваных і доўгачаканых святаў на календары заходнехрысціянскіх канфесій. Сёння кульмінацыя святкаванняў. У храмавых святынях увесь дзень будуць праходзіць набажэнствы, лейтматыў якіх светлы і ўзнёслы: "Хрыстос нарадзіўся!"

Па традыцыі, наведаўшы касцёл, людзі працягваюць адзначаць Раство ў сем'ях: накрываюць багатыя святочныя сталы і дораць адно аднаму падарункі. У гэты і наступныя восем дзён (Актаву Раства Хрыстовага) прынята хадзіць адно да аднаго ў госці і дзяліцца радасцю.