Вавёрак усё больш у сталічных парках

14.05.202016:24

Вавёркі - у парках і скверах Мінска! З надыходам цёплага надвор'я спрытныя грызуны актывізаваліся, і зараз іх можна убачыць амаль у кожнай зялёнай зоне.
Спецыялісты сцвярджаюць: за апошнія два гады гарадская папуляцыя звяркоў павялічылася ў некалькі разоў. Мінчане нават падкормліваюць гарадскіх вавёрак. Пра інфраструктуру для рыжых звяркоў - Ілья Цвяткоў.

На прагулку ў лесапарк Мядзвежына Аляксей Пяскоўскі з унукамі выходзіць кожны дзень - паназіраць за вавёркамі. Жвавы звярок тут галоўная славутасць. Паводле слоў мужчыны, грызуны амаль не баяцца яго. Наадварот, чакаюць ад наведвальнікаў парку ласункаў.

Два гады таму колькасць пушыстых грызуноў у Мінску знізілася да некалькіх дзясяткаў асобін

Зараз, паводле слоў заолагаў, папуляцыя гарадскіх вавёрак прыйшла ў норму. Звярок выдатна прыстасаваўся да гарадскіх умоў. Каб асвоіцца ў новым асяроддзі, выкарыстоўваюць так званы інстынкт пазнання.

Павел Велігураў, навуковы супрацоўнік лабараторыі НПЦ НАН Беларусі па біярэсурсах:

"Вавёркі больш за ўсё спрабуюць адшукаць насаджэнні з хвойнымі дрэвамі, пажадана, каб іх было паболей. Ахвотна займаюць гэтыя месцы і выдатна там сябе адчуваюць. Гарадскія вавёркі з цікаўнасцю ставяцца да чалавека, разглядаюць яго, вывучаюць. І калі іх прыкормліваць, то ў прынцыпе яны могуць стаць цалкам ручнымі".

У месцах, дзе вавёркі жывуць цэлымі сем'ямі, арганізуюць кармушкі, падобныя да птушыных. Іх можна рабіць самастойна з дрэва ці з непатрэбнай пластыкавай бутэлькі.

У некаторых паркавых зонах для рыжых грызуноў зрабілі цэлыя фуд-корты

Паколькі да такіх умоў вавёркі добра прыстасаваліся, таксама як і да чалавека, тут іх можна карміць проста з рук.Сілкуюцца звяркі насеннем і арэхамі. Але ў выбары харчавання вельмі пераборлівыя. Напрыклад, салёны ці з дабаўленнем спецый арахіс ім не падыходзіць.Але медыкі перасцерагаюць: карміць маленькіх дрэвалазаў неабходна вельмі асцярожна. Бо яны, як і многія дзікія жывёлы, могць пераносіць вірус шаленства.

Таццяна Пунінская, загадчыца траўматалагічнага аддзялення 6-й цэнтральнай раённай клінічнай паліклінікі г. Мінска:

"Вавёрка можа проста занесці інфекцыю слінай, а можа і выпадкова ўкусіць, даядаючы з рук апошні арэшак. У гэтым выпадку тэрмінова трэба прамыць ранку праточнай вадой і апрацаваць дэзынфектарам. Пасля гэтага абавязкова трэба звярнуцца ў найбліжэйшую ўстанову аховы здароўя, дзе акажуць неабходную дапамогу".

Перад тым як пазнаёміцца бліжэй з незвычайнымі насельнікамі сквераў, спачатку трэба ўважліва паназіраць за паводзінамі жывёлы. Калі звярок агрэсіўны і смела падыходзіць да чалавека, лепш прайсці міма і перанесці назіранне за грызунамі на іншы дзень.