Беларуская дзяржаўная акадэмія мастацтваў адзначае 75-годдзе

Сёлета Беларуская дзяржаўная акадэмія мастацтваў адзначае 75-годдзе. Юбілейныя мерапрыемствы запланаваны на восень, а зараз пачынаюцца прыёмныя экзамены. Імідж акадэміі спачатку на тэрыторыі Савецкага Саюза, а зараз на міжнароднай прасторы заўсёды стваралі выкладчыкі, выпускнікі і сённяшнія студэнты.

Расказвае Ларыса Гулякевіч.

Вітражы, пано, карціны, інсталяцыі ў розных складаных тэхніках упрыгожваюць адноўлены будынак Акадэміі мастацтваў. Гэта курсавыя і дыпломныя працы студэнтаў, якія зараз знаходзяцца у фае любімай альма-матэр.

Гэта арт-сцяна - аўтарства сёлетняй выпускніцы Лізы Бутрыс. Насупраць – выпускніцы мінулага года Кацярыны Янтоўскай.

Міхаіл Баразна спрабаваў сябе ў розных відах мастацтва, хіба што толькі скульптурай не займаўся.

Любімая справа - фотамастацтва. Кніжная графіка і дызайн, плакат і фатаграфіка. Розныя эксперыменты са стужкавай і лічбавай фатаграфіяй раскрываюць вялікія мастацкія магчымасці.

Фотамастацтвам захапіўся яшчэ ў 13-гадовым узросце, калі тата падарыў фотаапарат. Ён з поспехам быў разабраны і з цяжкасцю сабраны. Пасля разумення тэхнічнага працэсу здымак і атрымання алергіі на хімічныя рэактывы праяўлення стужкі, Міхаіл захаваў любоў да фота назаўсёды. Дарэчы, талент ён атрымаў у спадчыну ад сваёй бабулі.

Любімае месца пленэрных здымкаў - маёнтак Фердынанда Рушчыца ў Валожынскім раёне менавіта восенню. А гэта - пастановачны здымак пад назвай "Кароль Лір". Вокны дамоў, як вочы сусветных сталіц. Аўтапартрэт. Праўда, без усялякіх фільтраў і мудрагелістых прыёмаў, фота зроблена ў адлюстраванні плазменнага экрана тэлевізара.

Спецыяльнае абсталяванне, прынцыпы раскадроўкі праграмы лічбавай апрацоўкі - цэлая навука, якую Міхаіл Баразна выкладае на кафедры графічнага дызайну. А пасаду рэктара Акадэміі займае ўжо 10 гадоў.