Беларусы дапамагаюць бежанцам з Украіны

У беларускую здраўніцу, куды былі накіраваны бежанцы з Украіны, прыехалі дэпутаты Палаты прадстаўнікоў. Парламентарыі пералічылі на рахунак Гомельскай абласной арганізацыі Беларускага Чырвонага Крыжа 10 тысяч рублёў. Для гэтых людзей, падкрэсліваюць дэпутаты, зараз вельмі важная падтрымка і псіхалагічная дапамога.

Бежанцы будуць забяспечаны ўсім неабходным, заявіў генеральны сакратар Беларускага Чырвонага Крыжа Дзмітрый Шаўцоў. Арганізацыя ўжо пачала працаваць у Брагінскім раёне. У вёсцы Гдзень побач з пунктам пропуску "Камарын" разгорнуты мабільны пункт абагравання. У модулі і палатках для бежанцаў ёсць ежа, электрычнасць, а таксама магчымасць звязацца з роднымі.

Чырвоны Крыж цесна ўзаемадзейнічае з мясцовай уладай. Прапрацоўваецца пытанне аб выдзяленні памяшкання пад склад у Гомелі, дзе будзе акумулявацца гуманітарная дапамога.