Бондар з Любані ператварае ствалы дрэў у прадметы побыту

Драўляныя бочкі, посуд і лыжкі. Бондар з Любані Мікалай Казлоўскі 15 гадоў ператварае ствалы дрэў у адмысловыя прадметы побыту. На рахунку майстра сотні зробленых сваімі рукамі вырабаў. Галоўныя інструменты - рубанкі, сякеры, варштаты. Матэрыял для драўлянага посуду падыходзіць адборны - толькі здаровыя дрэвы - пераважна дубы, радзей алешына. Каб вычасаць рукамі бочку Мікалаю Казлоўскаму, неабходна некалькі дзён. У самаробных драўляных ёмістасцях не адзін сезон можна захоўваць салёныя агуркі, мочаныя яблыкі і квашаную капусту.

Пад кіраўніцтвам Мікалая Казлоўскага працуе ў Любані і свая школа бондарства. Старажытнае рамяство майстар выкладае школьнікам. На заняткі прыходзяць пераважна хлопчыкі. Некаторыя з іх затым атрымліваюць спецыялізаваную прафесію і праз гады вяртаюцца да гэтага рамяства.