Фестываль "Радасць" прымае гасцей і ўдзельнікаў на новай лакацыі

Добрая традыцыя напярэдадні свята Нараджэння Хрыстовага ад Свята-Лізавецінскага манастыра. Фестываль "Радасць" прымае гасцей і ўдзельнікаў на новай лакацыі - у новабудоўлі культурна-асветніцкага цэнтра "Каўчэг". Праграма форуму ў рэпартажы Наталлі Бардзілоўскай.

Мы ў самым "радасным" месцы Мінска. Духоўны фестываль "Калядная радасць", які традыцыйна пачаўся пад Новы год і Нараджэнне Хрыстова, стварае святочны настрой, збірае сяброў, дорыць забаўную праграму, шмат музыкі і россып падарункаў. Сувенірныя лаўкі з таварамі на любы густ і багаты прадуктовы кошык да святочнага стала. Адным словам, усё як заўсёды. Добразычліва і ўтульна. "Радасць" - велікодная, пакроўская, калядная - чымсьці падобная заўсёды адна на адну. Галоўная ж адметнасць гэтага фестывалю - сёлета ён праходзіць у родных сценах. Праект Свята-Лісавецінскага манастыра набыў, нарэшце, уласную пляцоўку на той жа манастырскай тэрыторыі.

Упрыгожаны ёлкамі і навагодняй атрыбутыкай "Каўчэг" - сапраўная калядная казка. Для дарослых і дзяцей, якія, безумоўна, не могуць застацца абыякавымі да батлеечных паказаў, музычных імпрэз з карагодамі вакол ёлкі, ласункамі і цацкамі. Двухтыднёвы фестываль падрыхтаваў для маленькіх і юных наведвальнікаў вялікую праграму, арыентаваную на самыя розныя дзіцячыя захапленні: майстар-класы па маляванні, лепцы, стварэнні ёлачных цацак сваімі рукамі.

На "Каляднай радасці" наведвальнікаў чакаюць сем’ямі. Для бацькоў, напрыклад, запланаваны шэраг гутарак на жывыя, злабадзённыя тэмы: узаемаадносіны ў сем’ях, выхаванне дзяцей і падлеткаў. Фестываль кранае сваімі інклюзіўнымі праектамі. Гледачоў запрашаюць падтрымаць увагай і апладысментамі інклюзіўны тэатр і экзаршы інклюзіўны хор "Радасць душы".

Фестываль "Калядная радасць" працягвае і дні памяці першага Патрыяршага Экзарха ўсяе Беларусі мітрапаліта Філарэта. Нованароджаны праект стане традыцыяй. І першая выстава пад назвай "Сэрца мілуючае" ўжо змянілася на экспазіцыю "Святасць зямлі беларускай". А ўсе творы мастакоў і іканапісцаў з Беларусі, Расіі і Малдовы.

Аўтары гэтых работ - дарослыя і юныя творцы, пераможцы тэматычнага конкурсу. Галоўнай умовай было з любоўю і майстэрствам перадаць прыгажосць праваслаўных храмаў, вобразы выдатных асоб, проста святло душы і радасць любімых царкоўных свят. Асобная галерэя на фестывалі аддадзена работам яшчэ адных канкурсантаў. Паглядзіце, як дзятва ў разнастайных тэхніках і матэрыялах увасобіла біблейскі Ноеў каўчэг. З хлопчыкаў і дзяўчынак, якія папрацавалі над мастацкім увасабленнем старазапаветных вобразаў, абавязкова вырасце новае пакаленне праваслаўных дойлідаў ці іканапісцаў, вераць арганізатары фестывалю. А пакуль прапануюць знаёмства з творамі сённяшніх майстроў, мастакоў іканапіснай майстэрні Свята-Лісавецінскага манастыра.

Вось-вось і фестывальныя будні перарастуць у вялікае свята. Нараджэнне Хрыстова ў храмах Свята-Лісавецінскага манастыра, як і ў іншых цэрквах Беларусі, пачнуць набажэнствамі 6 студзеня.