Нацыянальнаму аэрапорту Мінск 40 гадоў

Галоўная паветраная гавань Беларусі - Нацыянальны аэрапорт Мінск - сёння адзначае круглую дату. Роўна 40 гадоў таму, 1 ліпеня 1983 года, прайшло афіцыйнае адкрыццё аэрапорта тады яшчэ Мінск-2 рэйсам з беларускай сталіцы ў Сімферопаль. А вось статус "Нацыянальны" аэрапорт атрымаў у 1997 годзе.

Прэзідэнт Беларусі Аляксандр Лукашэнка павіншаваў работнікаў Нацыянальнага аэрапорта Мінск з яго 40-годдзем: "Галоўная паветраная гавань Беларусі па праве лічыцца яе візітнай карткай. Менавіта адсюль пачынаецца знаёмства падарожнікаў з нашай краінай - высокатэхналагічнай, прыгожай і гасціннай".

Лідар пажадаў калектыву і ветэранам Нацыянальнага аэрапорта Мінск моцнага здароўя, чыстага блакітнага неба і пакарэння новых вышынь.

7,5 млн пасажыраў за год - такая прапускная здольнасць сучаснага аэравакзала. Свой першы мільён паветраная гавань абслужыла ў 2008 годзе. Каля 3 млн фіксавалі ў 2016-м. Праз год - 4 млн. І 5 млн пасажыраў (гэта пакуль рэкорд) - у 2019-м. Зараз Нацыянальны аэрапорт Мінск прымае ў два разы менш людзей – паўплывала рэха пандэміі і санкцыі, нягледзячы на якія паветраная гавань Беларусі не закрывалася ні на адзін дзень. Нацыянальны аэрапорт Мінск сёння - сучасны, камфортны комплекс збудаванняў і галоўнае - бяспечны.