Галерэя "Універсітэт культуры" прымае выставу "Ад роднага парога"
Немудрагелістыя сюжэты, але поўныя шчырых душэўных вобразаў. Сталічная галерэя "Універсітэт культуры" прымае выставу "Ад роднага парога". Аўтар - прафесійная мастачка, паслядоўніца рэалістычнага жывапісу і кірунку імпрэсіянізму. Алена Краснашчокава ў сваім творчым партфоліа мае з тры дзясяткі выстаў.
Новую экспазіцыю творца адкрыла напярэдадні - з вернісажу рэпартаж нашага карэспандэнта Наталлі Бардзілоўскай.
У яе жывапісе няма цьмяных ці чорных фарбаў. Пазнавальны почырк Алены Краснашчокавай - працы жыццярадаснай палітры. З палотнаў льюцца яркія промні, усміхаюцца сонечныя кветкі, што ні твор - квітнеючыя сады, сакавітая зеляніна беларускай прыроды, людзі з добрымі вачыма, пастараль нашых вёсак і архітэктура гарадоў. Пейзажы, партрэты, нацюрморты - у экспазіцыі 30 работ, абагульненых яскравай назвай - "Ад роднага парога".
Алена Краснашчокава родам са Слуцка. Мастацкую адукацыю атрымала ў Кобрыне. Сёння жыве і працуе ў Маскве. З пленэрамі і выставамі аб'ехала амаль увесь свет. Але мастачка не забываецца пра сваю малую радзіму. Штогод наведвае Беларусь. Вось і гэтую выставу прысвяціла родным матывам.
У цэнтры выставы - палатно, на якім бацькоўская хата аўтара. Тая самая, у Слуцку, дзе па-сённяшні дзень жыве 82-гадовая матуля Алены Краснашчокавай. "Месца сілы" - так пра гэты падворак у сланечніках гаворыць сама мастачка. Падобны - свой "энергетычны цэнтр" яна бачыць у Жыровічах - манастыру Краснашчокава прысвяціла асобны твор. У галерэі - яе погляд на Мірскі замак, ваенныя мемарыялы Беларусі. Аўтар пісала Венецыю і Дрэздэн, Парыж і Кёльн, Елохаўскую царкву Масквы і прыродныя краявіды Рыбінска - у падборцы мастачкі сапраўднае падарожжа, якое ў рэшце рэшт прыводзіць майстра ў родную Беларусь.
Да 900-годдзя Слуцка мастачка падарыла роднаму гораду шэраг сваіх прац. Многія яе карціны ў прыватных галерэях, як беларусаў, так і аматараў мастацтва з Еўропы, Паўднёвай Афрыкі, Расіі і ЗША. На рахунку Алены Краснашчокавай 30 выстаў, самыя прэстыжныя з якіх адбыліся ў Зорным гарадку і Манежы ў Расіі, у культурных цэнтрах імя Твардоўскага і Чэхава. Цяпер і 9 жніўня экспазіцыя творцы - у галерэі "Універсітэт культуры" мінскага Палаца Рэспублікі.